Yoob 14

Unil maŋfal wiiŋyi kaa fɔ̀kɔ̀ ní ki gbí isaa

1 Unimpu saaleen di màl̄ unil.

U-maŋfal wiiŋyi kaa pée fɔ̀kɔ̀ ní ki cáá agìń.

2 Unil bí kii nsupumpukumee ní, u wīintí ní kí yɔ́ĺ.

U bí kii mboon nín bí puee ní, kaa yúntí^a.

3 Mimmee Unimbɔti, an niliu gbanti ní a kpèéee?

Man ní a cáǹ ibɔsoonaaa?

4 Ŋma di ŋūǹ kí lēē circir wanti tin kaa bí circiree poon?

Báà ubɔ kpá!

5 Di sá yii sii di kàan̄ unil maŋfal wiiŋyi ki tīī-u,

sii di síiǹ iŋmal in nyɔkɔm u máaǹ kí ŋée,

sii di síiǹ u-maŋfal gbeennyɔkɔ kin waa ŋūǹ kí jītée.

6 Páatí a-nimbikpeeŋu u-pu kí yàntī-u soooo,

ú ŋmā kí kúntí u-maŋfal wiiŋyi ŋgbansɔŋfin,

kii upaadaan nín kúntí u-tundi ŋwiin puee.

7 Busubu búǹ cáá dimákal:

bi yaa gāā-bu, bu ŋūǹ kí fàtīí túkú,

bu làá nīn pée cɔ́tí ní kaa gbèentí.

8 Báà bu-nyaaŋyi yaa púĺ kitiŋin

ní bu-yil yaa ŋá kii di kpíì kitiŋinee,

9 bu yaa gbìl̄ nnyim puee, see bú fàtīí fìkitī

ní kí tɔ̄ mpamu kii kisubikee.

10 Ama unil úǹ yaa kpíìyee, waa ti cáá mpɔn.

Unil fooku yaa nyáń u-nee, u gíti bí tilatin?

11 Dimɔɔl ŋūǹ kí fóotí,

ibun ń kpā,

12 ama unil un dōoǹ u-ŋaliŋu puee kaa ti yíkí.

Kí cáá sāā ŋyunti ŋun kutagbɔŋu

dáá bí nee, waa làá fìntī,

u pée kpá kí yīkì u-geemin.

13 A yaa bàà dū-mi ki bál̀ ditaŋkpiilin,

kí bàkā m-pu niin kí cáá sāā ŋyunti ŋun ní a-ŋuul làá sɔ̀ŋkèe,

ní kí síiń-mi iwiin in nyɔkɔm m làá ŋá niin ní á nín téetí m-puee.

14 Ama unil un kpíìyee gíti ŋūǹ kí gítiń dimaŋfalinaaa?

M bàà làá jī kimɔtii m-tumpɔɔl nee yuntiŋu poon,

kí nīn cí ŋyunti ŋun ní ubɔ làá dāá fōō-mee.

15 Niinee a yaa yíiń-mee ní ḿ kíí-si,

a bàà làá nyàab̀ kí ká man a-wannaaŋkaati.

16 Aa bàà làá gíti dū m-yìntitam kí yíiń tiba.

Too, kɔŋkɔnnee, sii di bí ki kàaǹ m nín dàatī m-taaŋi puee.

17 A bàà làá dū m-yìntitam kí báĺ kilɔbikin,

ní kí bìin̄ m-kpitii pu kii bi nín ŋàl̀ kudii puee.

18 Ama dijool cìŋkī ní kí yàaǹ,

ní ditaŋkpal ń nìkī mpaan ŋun pu di nìn bée.

19 Nnyim ŋūǹ kí líntí kí dóó ataŋkpee.

Utaa nì kí ŋmɔ́ kí càkatī kitiŋ.

Míǹ mbaantiim ní a nàantí unil mákal.

20 A dù-u kí yā kitiŋ ní ú búntí kaa ti gítiń.

A bíiĺ u-nimbiin ní kí jà-u.

21 Bi yaa bíi tìì u-jipɔmbi jilmaaa, úǹ kaa ti pée nyí tiba,

bi yaa tí sīntì-bi taapuɔɔɔ, waa tí nyí.

22 Waa ti nyí tiba ki kútì u-wuŋgbaŋŋu

nín bíi jīǹ falaa uŋyee pu,

u-naabuŋu baba pu ní u ŋūǹ kí yāliŋkì.