Yoob 15

Eeliifaasi nín sòon̄ puee: Unikpiti kpá kí ŋmátí

1 Niinee ní Eeliifaasi fōō dinyɔɔbundi ki lī yii:

2 Uciŋfiti un bí kii siiyee kaa kíikí tibɔti kí tɔ̄ kutaa,

waa sòoǹ tibɔti an kaa cáá taapu.

3 A cáá anyɔɔbun ŋin kaa cáá dikílee ki mɔ́tí a-ba pu,

a pée sòoǹ yii an nín sá á sòoǹee ní.

4 Áli gba a bíi bíiĺ dinimbɔtinool,

a bíi nàantí ŋwimmeem Unimbɔti nimbiin dee.

5 A bíi sòoǹ míǹ kun puee a sá unikpiti,

ní ki sòoǹ kii mili mili dambee.

6 A-nyɔkɔ poon nyɔɔbuŋŋi di bíi kù a-bɔti, an kaa sá man.

Tin kɔkɔ a sòon̄ee fātìi bíi kɔ́kɔĺ-si.

7 A dàkafī yii sii di sá unipeepeekaa un bi màl̄ kitiŋ pueeee?

Mimmee bi màl̄-si ki wāatì ní ki nín náań ŋgbantamuɔɔɔ?

8 A nyí Unimbɔti nín nìn bɔ́ntì tin dibalin kí ŋéeee?

Sii baba di cáá iciinaaa?

9 Ba ní sii baasii nyí ní timbi kaa nyí ní?

Ba ní sii gbìl̀ taapu ní timbi kaa gbìl̀ ní?

10 Kpèè utikpil un yúntèe bí ti-kansikin,

unil un kpíǹ a-baayee!

11 A dàkafī yii aa nyàab̀ Unimbɔti ŋmeendi

din u dī ti-nyɔɔbummɔɔŋŋi pu ki tìì-si nee níii?

12 Ba pu ní an yòontí-si míǹ?

Ba pu ní a dàab̀-ti míǹ?

13 Ba pu ní a díkí Unimbɔti pu míǹ?

Ba pu ní a yāntì anyɔɔbun nee juti nyáń a-nyɔkɔn?

14 Unil sá ba ní ki gà u-bindi yii u bí circir?

Ninsaal sá ŋma ní ki dàkafī yii u bí deedee?

15 Unimbɔti yaa kaa máká úǹ u-ba tuuŋyi pu,

ní kutagbɔŋu yaa kaa bí circir u-ceeyee,

16 kin ataa aŋa pu ní unil un cáá titantan kaa bí tiban,

unil un ŋáań ikpiti kii bi nín nyù nnyim pu nee pu ní u làá nīn máká?

17 Pīlifì, m làá dàkà-si tiba,

m làá māafì-si tin m kée.

18 M làá māafì-si biciŋfitiibi dàkal,

didàkal din ní bi fōō bi-naanjab ceeyee.

19 Unimbɔti nìn dū kitiŋ ki tīī bíǹ baba ní,

báà unicaan kaa nìn kɔ́ bi-pu.

20 «Unikpiti jīǹ falaa ní u-maŋfal wiiŋyi kɔkɔ poon,

ní uwɔ́bil maŋfal wiiŋyi kaa náaǹ.

21 Ineen in fàantée lɔ́kɔfí u-tafaliŋin.

Ŋgbansɔŋfi yuntiŋu ní digaŋgam dambi lítí u-pu.

22 Waa ti cáá dimákal yii u làá ŋmā kí ŋmátí kí nyā dibɔmbɔndin.

Di sá yii binib cí kí dū kitàataajiki kí kpɔ̀-u.

23 Kaasaabi di làá jī-u.

U nyí tiŋan yii dibɔmbɔndi wiiŋŋu kaa ti dátiǹ-u.

24 Dibɔmbɔndi wiiŋŋu ŋun dòoń gbantee kɔ̄ntí-u dinyoondi,

dinimbinaamandi nì ilandɔkɔ làá jēetí u-pu,

kii ubɔti janjakitil nín bɔ́ntì kí kíĺ dikɔ̀ndi puee ní.»

25 Di sá yii u tāntì u-ŋal kí fáá Unimbɔti,

u yíkì kí jáǹ Unimbɔti Mpɔŋkɔdaan.

26 U sáń ki cá u-yil tīī kí jáǹ Unimbɔti,

digbampɔɔl din gbìfèe wúń u-pu.

27 U gbīfiǹ ŋkpam dūu bīiǹ u-nimbiin

ní u-wunti bí gbàlgbal.

28 Ntimu mun bi kpéelikèe poon ní u kóò,

adiin ŋin poon baa ti kóòyee poon,

di sá yii ŋi nìn bíi lítí ní.

29 Unil gbantee kaa ŋūǹ kí kpántí ugaaja dalba dalba,

ní u-gaajati kaa làá yúntí.

U kpá kí jī dinyandi kitiŋ pu.

30 Waa làá ŋmā kí ŋmátí kí nyā dibɔmbɔndin.

U làá nīn bí kii busubu bun ŋŋmi wùn̄ee ní,

ní Unimbɔti fooku ń yòon̄-u kí tɔ̄ kí fá ndan.

31 Dimuuldi pu ní u máká.

Ama dimuuldi kaa sá nsammɔnti,

di sá yii dimuuldi ní bi làá gíiǹ kí pà-u.

32 Míǹ làá bàń-u kí wàatī ní u-maŋfal wiiŋyi ń nín kúntí,

ní u dāa gíti kpá kí túkú tifaapɔn.

33 U làá nīn bí kii bufiinyisubu biliŋ yaa kaa láá bīń an nín gbátí puee ní,

àá kii ɔliifi supumpukum nín gbátí puee.

34 Unikpiti dicaŋkun yab làá kpántí biŋmaŋŋmantiibi ní.

Ŋŋmi di làá wà u nín fìkī binib wanti ki máń kudii kuŋyee.

35 Unil un yaa cáá ikpiti poolee màal̀ nnaabu ní.

Kun ní u bɔ́ntì u-pɔbilinee làá ŋmàtiǹ úǹ u-ba ní.