Yoob 16

Yoob nín kíí puee: M cáá useeradaan ubɔ yilpu

1 Niinee ní Yoob kíí yii:

2 Tin a sòon̄ee, m gbìl̄ míǹ ŋfunyɔm dilaataal pu.

Ni sá biŋmeenliibi bin kaa pée bí tibanee ní.

3 Ni bí-mi yii: «Tin a sòoǹ an kaa cáá taapu nee làá kúntí badal dee?»

àá: «Ŋma di páb́-si á kíí míǹ ní?»

4 Ni yaa bàà bí mpaan ŋun pu m bí nee,

m bàà làá sòoǹ kii ni nín bíi sòoǹ pu nan ní.

M bàà làá bɔ́ntí anyɔɔbun ŋin kítèe kí sòoǹ ni-pu,

ní kí nīn gbákafí diyil ki bèel̄-ni.

5 M bàà làá sòoǹ kí tīī-ni kunyannyaau,

ní kí sòoǹ kí taa gbèen̄ áli ni-weeŋyi ń dāá kúntí.

6 Ama m yaa bíi sòoǹee, m-weeŋyi kaa sɔ̀ŋkī,

m yaa tí ŋmíl̀aaa, an kaa tí sɔ̀ŋkī.

7 Ibaamɔn poonee, Unimbɔti yāntì m gīī,

u kúntì bin kɔkɔ nìn māntìi tú-mee.

8 M-wunti nín dáaĺ pu ŋmìiiyee sá m-seeradaaŋwu,

m nín dúntì puee kɔ́kɔĺ-mi ní ki kù m-bɔti.

9 Unimbɔti tɔ̄ntì-mi u-ŋuul poon,

u kùl̄ ki kāl̀ m-pu u-nyiŋŋi gà kàkaka.

U sá m-nannanliu ní ki kpèé-mi címmm.

10 Binib wàatī bi-nyɔmmu bàaa m-pu,

bi fátí-mi itampa ki sìí-mi,

bi kpáfí kinyɔkɔ kí jáǹ-mi.

11 Unimbɔti dū-mi ki líiǹ campɔntib bin kaa bí tibanee,

u dū-mi ki ŋá binikpitib ŋaan.

12 M nìn bí ŋgbansɔŋfin ní Unimbɔti dɔ́miń ki cīŋkì-mi.

U tɔ́ ki kíĺ m-sil ki dū-mi ki lúkú kitiŋ,

ní ki màkā-mi kii ukpanee.

13 U-piiŋyi ŋàaǹ an kɔkɔ pu fìrrr fìrrr.

U yá-mi an kɔ́ ki sāā m-ceebiliŋ an kaa cúú-u isaa,

u yāntì m-kaami cɔ́tì ki dɔ̄ ki pùub̀ kitiŋ.

14 U wúliń m-pu kii ujanjalee,

u yá-mi ki tīī-mi tiweendi.

15 Kpɔsata ŋma ní m kíǹ ki pèentí,

ní m dū m-nimbiin ki múĺ ntamin.

16 M súń áli m-nimbiliŋ mántì cínciŋ,

ní m-niŋgbunti dūu nyīŋfì maa ti kpáàa wāĺ tiŋan.

17 Ama ma mun kaa ŋá tipɔmbɔti jaanjaan.

M pée mèé Unimbɔti nì dipɔbil diba ní.

18 Kitiŋ, taa bìin̄ m-fatikuu pu,

yàntī bí nīn pée gbìl̀ m-kuŋkuuntii pu^a.

19 Di sá yii m cáá kɔŋkɔnnee seeradaan ubɔ yilpu,

tiŋman, m cáá ubɔ yilpu niin u mɔ́tí m-pu.

20 M-bɔɔbi bíi bèel̄-mi,

ama Unimbɔti ní m sūǹ ki kpèé.

21 M-seeradaaŋwu ń nīn sá un làá pàtī man nì Unimbɔtee,

kii unil nín mɔ́tí u-juti pu puee.

22 M-maŋfal wiiŋyi kaa ti kíǹ ki náaǹ,

m tākaǹ nsan ŋun pu unil yaa nóó waa ti gítińee.