Maa ti cáá dimákal
17
1 Maa ti cáá ŋfam, ní m-maŋfal wiiŋyi kaa ti náaǹ.Ntaŋkpiifal di kíǹ ki dɔ̄ ki cí-mi.
2 Bibeeliliibi māntìi tú-mi,
bi nín jáà nì mi puee yāntì maa ti ŋūǹ kí gèeǹ.
3 Unimbɔti, pà m-pɔndi kí fīī-mi kí líí,
di sá yii ŋma di gíti bí ki làá ŋá míǹ kí tīī-mi?
4 Ibaamɔn puee, a pīiǹ m-bɔɔbi ciiŋyi pu,
taa yàntī bí jī m-pu dinyandi.
5 Bi náań nì un yíiń u-bɔɔbi bí jī tijin,
ní u-biyaamu dɔ̄ ŋkùmee ní.
*
6 M kpántì nlan ní binib cáa gà ki lāā.
M sá unil un nimbiin bi tíiĺ ki làbitēe ní.
7 Kunimbaau yāntì maa ti wāĺ tiŋan,
m-ŋalii nì m-taaŋi kpántì kii kujiliŋuee ní.
8 Bibulcinnib yaa ká-mee, bi bàkatī ní.
Maanyiibab fòol̄ bikpitib pu mbum ní.
9 Bi lì yii: «Deedeedaan ń nīn pɔ̄ɔntí,
bin ŋalii bí circiree ń mɔ̀tīí ká mpɔn!»
10 Nimbi m-bɔɔbee, dāam̄maan, ni-kɔkɔ ń gítiń!
Ama maa ká uciŋfiti báà ubɔ ni-kansikin!
*
11 M-maŋfal wiiŋyi dóò, tin m bɔ́ntèe kɔkɔ
nì m-mákal kɔkɔ tɔ́ nnyimin.
12 M-bɔɔbi bíi lì yii kunyeeu làá fōō ŋwiimpu paaŋŋu,
ní kutaa tóob́ kí wúntí.
Kaa nyí yii kunyeeu di bíi móotí.
13 M gíti máká ba pu?
An yaa kaa sá ŋkɔŋkoon pu ditaŋkpiilin,
an yaa kaa sá ḿ bíĺ m-kampeeku dibɔmbɔndin!
14 M tùkū m-kaakul yii: «Sii di sá m-baa»,
ní ki tùkū dikɔtuul yii: «Sii di sá m-na nì m-niisal!»
15 M-mákal gíti bí la?
Ubɔ ká m-naam laŋkaaa?
16 M-mákal nì m-naam ń táá-mi tí nīn sìntī ditaŋkpiilin,
ti-liitil lítì ntamin.