Biilidaadi nín sòon̄ puee: Nnaabu di dɔ̄ ki cí unikpiti
18
1 Usuwaja Biilidaadi fōō dinyɔɔbundi ní ki lī yii:2 «Kí cáá sāā ŋyunti ŋulɔŋu ní a làá ŋmīĺ ní?
Dàkafì kí wàatī ní tí nín sòoǹ nì si.
3 Ba pu ní a cáá-ti ki yíì tiwaŋkuti ní?
Mimmee a dàkafī yii ti sá bigbaambi deeyaa!
4 «Diŋuul din a gííyee di bíi tìì-si tiweendi.
Mimmee a dàkafī yii sii puee, kitiŋ ń kpántí kuteeu,
àá ditaŋkpal ń kpántí di-paaŋŋu ní?
*
5 Ukpiti walifiŋu di kúù,
ní u-faŋŋu poon ŋmiŋu ń gbèen̄ kaa ti fòol̄.
6 U-diiku poon walifiŋu làá kpántí dibɔmbɔndi,
ní fitila un sàkā u-yil púee ń kpú.
7 «Dooooyee u nìn còom̄ ní kìbkib,
kɔŋkɔnnee u kíǹ ki còom̄ ní yóooo,
ní tin u bɔ́ntì kí ŋée làá yàntī ú lítí.
8 U cōom̀ ki cūtìi kɔ́ kulaaŋŋun,
kulaaŋŋu sɔ̀kɔ̄ sɔ̀kɔ̄ u-taaŋi.
9 Kutaliŋŋu làá sàl̄ u-tagbindi,
bi píĺ u-saŋŋu pu ŋŋmii án sàl̄-u.
10 «Ŋŋmii ŋun làá sàl̄-uee bál̀ kitiŋin,
kutaliŋŋu dɔ̄ nsanni ki cí-u.
11 Ijaan kɔkɔ puee, dinyoondi jì ki bīī u-boon
ki tà ki kíbití-u.
*
12 Úǹ un nìn pɔ̄ɔ̄yee, ŋkùm cúú-u kɔŋkɔnnee,
falaa dɔ̄ ki kɔ́ĺ-u.
13 Falaa gbanti bíi ŋmóò u-wuŋgbaŋŋu,
ní ŋkúm làá ŋmɔ́ kí bīil̀ u-taaŋi nì u-ŋalii kɔkɔ.
14 «Bi làá dāá nyāntí-u u-kɔŋkooŋŋu kansikin laakin u bí ŋgbansɔŋfinee,
kí dàtī-u kí cùnnì ditaŋkpiil bɔtiu cee.
15 Ubɔ ŋūǹ kí kɔ́ u-diikun, di sá yii waa ti yì-ku,
ní kí dū farwata kí yàaǹ tin kɔkɔ u cááyee pu.
16 U làá nīn bí kii busubu bun kpíìyee ní,
bu-nyaaŋyi kūń taapu ní bu-faati fáaḿ yilpu.
*
17 Binib làá súntí u-pu kitiŋee pu,
baa ti pútí u-yindi laaba.
18 Bi làá nyāntí-u ŋwalifin kí cáá tɔ̄ dibɔmbɔndin,
ní kí jà-u kitiŋ pu laakin binib kóòyee.
19 U-nibul kansikinee, waa cáá kibiki kaa cáá naantiiu,
ubɔ kaa bí u-dicaŋkun ki ŋmátì.
20 Tin làá bàń-uee làá kɔ́ǹ ŋwìiń jeetilaŋki pú yab tiwool,
án làá kɔ́ǹ ŋwìiń nyalaŋki pú yab tifaandi.
21 Kun di bàń unikpiti nì u-dicaŋku puee dee.
Doo di nìn sá mpaan ŋun pu baa nìn nyí Unimbɔtee.»