Yoob 19

Yoob kíí Biilidaadi: Unimbɔti kaa dū-mi ki fá

1 Yoob fōō dinyɔɔbundi ní ki bí yii:

2 «Ni làá nīn sàantí-mi yéè kí cáá sāā ŋyunti ŋulɔŋu ní?

Kí cáá sāā ŋyunti ŋulɔŋu ní ni làá dū ni-nyɔɔbuŋŋi kí nàan̄-mi ní?

3 Ŋfunyɔm saalaa sɔ̀ ni nín bí ki sìí-mee.

Ni nín bí ki sàantí-mi pu nee kaa cáá-ni icoooo?

4 «Báà an yaa sá ibaamɔn yii m yīntì,

man nì m-bɔti deeyaa!

5 Báà ni yaa dàkafī yii ni jítiǹ-mi,

ní m-falaau dàkà yii m sá unikpitaaa,

6 ní béémaan yii Unimbɔti di yì m-bɔti

ní ki yāntì m jéetì u-laaŋkun.

7 Báà m yaa bíi gbáà ibiil yii bí fīī-maaa,

ubɔ kaa làá kíí-mi,

m yaa fáá ibiil yii bí jòoń-maaa,

ubɔ kaa làá dāan̄ kí pɔ̀-mi.

8 Unimbɔti bàkā m-saŋŋu pu ḿ taa ŋmā kí jītí,

u dū dibɔmbɔndi ki tɔ́ m-saŋŋu pu.

9 U gbákal̀ m-nyooti kɔkɔ,

u fōō tin nìn sá kii kibeefuulii ki cíkí m-yil puee.

10 «U pée nāaǹ-mi ijaan kɔkɔ pu ní m làá kpú nín̄ nee,

u cúú m-mákal ki lēē kii bi nín fùkù busubu puee.

11 U-ŋuul fòol̄ m-pu ní lìblib,

m kpántì u-nannanliu ní.

12 U-janjakitil kpáfì dicilpu ki dòoń ki náaǹ,

bi nyàab̄ nsan ki bāań-mi

ki māntìi tú m-diiku kí jáǹ-mi.

13 Unimbɔti kākatì m-nabiyaamu ki wāatì-mi.

Bin nìn nyí-mee kíǹ ki sáń-mi ní.

14 M-nabiyaamu kiŋkiŋ wáŋkì,

m-bɔɔbi súntì m-pu.

15 M kpántì kii unicaanee ní

ki tīī bin nìn kɔ́ m-puee nì m-tɔntɔnliibi,

bi ŋáań-mi kii unil un baa nyée ní.

16 M yaa yíiń m-tɔntɔnliu, waa kíikí,

báà m yaa gbāam̀-u.

17 «M-fooku nín núù puee, m kíǹ ki cáá m-nimpuu titantan,

m-nabiyaamu mun m nì bi pēē nee núutì-mi.

18 Ki kpáaǹ gba campɔntib kpèé-mi fám.

M yaa kíĺ ki bíi sòoǹee, ní bi bèel̄-mi.

19 M-bɔɔbi bimɔntiibi nimbil kaa ti là kí wāl̀-mi,

ní bin m nìn néeńee fātì bi-boon ki tīī-mi.

20 M-gbaŋŋu di pée kíǹ ki bīī m-kpabiŋ pu,

m ŋman pée kpíì ní.

21 Nimbi m-bɔɔbi, sɔ̄maan m-saai, sɔ̄maan m-saai,

di sá yii Unimbɔti ŋal di fáá-mi!

22 Ba pu ní ni mun bíi sàantí-mi kii Unimbɔtee ní?

Naa sāaǹ-mi ki gīīii?

23 «M bàà là yii bí ŋmà m-nyɔɔbuŋŋi nee kí síiń,

bí ŋmà-ŋi kí ŋá kugbɔŋun.

24 M bàà là yii bí dū kigaai kí cáká

m-nyɔɔbuŋŋi nee kí nákań ditaŋkpal pu,

ŋí nīn bí ki cá jaanjaan!

25 Mamee, m nyí m-mɔtiliu nín bí dimaŋfalinee,

úǹ di làá sòoǹ kí pɔ̀-mi kitiŋ nee pu.

26 Bi yaa láa bíil̀ m-wuŋgbaŋŋu nee ki dóòyee,

mama m-ba làá dāá wāl̀ Unimbɔti.

27 Mama m-ba làá dāá wāl̀-u nì m-nimbibuliŋ.

Mama m-ba di làá dāá wāl̀-u kaa sá ubɔ.

Ŋyunti gbanti ń bàń malaa, di sá yii an júkufí-mi ní.

28 «Ni yaa bālifì ni-ba yii: <Mana ní ti làá ŋmā kí sàaǹ-u

ní kí ká nnaakpal kí yíiń-u tibuul?>

29 Ní fàŋkìmaan kitàataajiki ni-ba pu,

di sá yii ni nín kā m-pu puee máaǹ ŋkúm ní.

Ní béémaan yii ibɔsoon bí.»