Yoob 20

Soofaar nín kíí puee: Ukpiti naabuŋu

1 Unaamaja Soofaar fōō dinyɔɔbundi ní ki bí Yoob yii:

2 M-landɔkɔi bíi téekí-mi ḿ kíí-si,

di sá yii an bíi lùkutī m-ni.

3 Tin a sòon̄ee sá disiibil ní ki tīī-mi,

ama m-nyil bíi lɔ́kɔfí-mi tin m làá dūú kíí-see.

4 Mimmee aa nyí yii doooo cannaaku,

ŋyunti ŋun ní Unimbɔti náań unil ki kāaǹ kitiŋ nee puee,

5 binikpitib nyandi kaa cá ndan,

ní bi-pɔɔpindi mun kaa súŋkáaa?

6 Báà udaan yaa fɔ̀kɔ̀ ki tūū kutaa,

báà u-yil yaa tùutī atagban,

7 u làá dāá kúntí kii úǹ u-ba bintee ní.

Bi nìn nyí-uee làá dāá bàlifì yii: «U bí la?»

8 U làá dāá wāŋkì kii kudamintiiuee ní,

baa làá dāá gíti ká-u.

U làá dāá wāŋkì kii kunyeeu leedakalee ní^a.

9 Bi nìn kpààa kāntí kijapaai gbanti, ama baa ti làá ká-u.

Laakin u nìn kóòyee, baa ti làá ká-u niin.

10 U-biyaamu làá gíiǹ tin u nìn fìkī biwɔfib ceeyee kí tīī-bi,

úǹ u-ba di làá gíiǹ u-gaajati kí tīī.

11 U nìn cáá mpɔn kii unaacimpɔɔnee ní,

ama u nì u-pɔŋŋu gbanti di làá kpāfì kí dòon̄ ntamin.

12 Ikpiti mɔ̄ u-nyɔkɔn ní cɔ́ncɔŋ,

u cáá u-limbil ní ki bìintí i-pu.

13 U móotí-i ní kaa gbèentí,

u pée kpùkū-i ní an mɔ̄ǹ-u.

14 Ama tijin tin u jíńee làá sūū u-poon

ní kí kpántí ukoobu looti niin.

15 Tigaajati tin u nìn dūu náĺee, u làá wùliŋkì-tì,

Unimbɔti làá yàntī ú nyāntí tin nìn kā u-poonee.

16 Tin u nìn móotée nìn sá ukoobu looti ní,

u làá kpú kii ukoowaati di jú-uee.

17 Waa ti làá ká mbùmbiyaamu mun poon ŋkpam pùub̀ee,

ibun in poon tisiil nì nnaabiim kpam pùub̀ee.

18 Kun u bìn̄ ki kée, u làá dūú tīī kaa làá ká kí dáká.

U nín bāntì kí ká ipaati iŋyee, waa làá ká kí jī.

19 Di sá yii u wɔ́b́ biwɔfib kaa tútuǹ-bi.

An nín bàà sá u mā u-diikuee ní u fìkī binib diiŋŋi.

20 U-pɔbil nín kaa sɔ̀m̀ tin u cááyee pu puee,

waa làá ŋmā kí kpāafì u-gaajati.

21 U sá upoofu ní ubɔ kaa ŋūǹ kí ŋmátí kí nyā u-ŋaan,

an pu ní u-naam mun kaa làá yúntí.

22 U làá nīn bí digbilin ní dinimbinaamandi ń jēetí u-pu,

bifalaadambi kɔkɔ ŋalii làá nyīī-u kí múĺ.

23 Ŋyunti ŋun u bíi gbēentí u-poolee,

ní Unimbɔti ń kpáatí u-ŋuul kí sìtī u-pu.

An làá dāá nì u-pu kii utaayee, an di dāa sá u-jinti.

24 Báà u yaa sáǹ ki ŋmátì tikúti kpaŋki kaa cúú-uaaa,

tasa kúti piiŋŋu làá cúú-u^b.

25 U làá dáaĺ kí fɔ́fí mpiin kí nyāntí u-wuntin,

ní kí nyāntí mpiin ŋun nyɔkɔ cɔ́m̀ee u-pɔɔlin.

Ama dinyoondi làá nīn dī-u.

26 Dibɔmbɔŋkpaandi di dɔ̄ ki cí-u dibalin,

ŋŋmi ŋun ubɔ kaa tūūyee làá wà kí céetí-u,

ní kí wà tin kíǹ u-diikunee nyíki nyiki.

27 Yilpu làá bìitī atuŋkpiti ŋin u túńee kɔkɔ pu,

ní kitiŋ ń lēē u-pu seera kí jáǹ-u.

28 Nnyiŋgbeen làá yòon̄ u-gaajawanti

ŋwiin ŋun Unimbɔti ŋuul làá dāá pōōyee.

29 Kun dɔ̄ ki cí ukpitee dee,

Unimbɔti nín bɔ́ntì tin ki cíitì-uee dee.