Yoob 21

Yoob nín kíí Soofaar puee: Ba pu ní an bútí binikpitib ní?

1 Niinee ní Yoob kíí yii:

2 Ní pīlifìmaan tin m làá sòoǹee tiŋan,

míǹ ní ni làá ŋmā kí ŋméeǹ-mi.

3 Ní pɔ̄maan-mi diyimɔɔl ḿ sòoǹ.

M yaa sòon̄ ki dóòyee, ni ŋūǹ kí bèel̀-mi.

4 Mimmee unil pu ní m bíi yáliŋkáaa?

Aayee! Kin ba pu ní ḿ taa ŋmèè kí gīī?

5 Kpèèmaan-mi tiŋan, án làá bàkatīǹ-ni ní,

ni làá dū ni-ŋalii kí bìin̄ ni-nyɔmmu pu ní kí taa ti sòoǹ.

6 Mama m-ba yaa bíi dàkafī tin bāań-mi nee puee,

an cútí-mi kufaaŋŋu ní ki ŋáań-mi nyàaa.

7 Ba pu ní binikpitib gbíntìi bí dimaŋfalin ní?

Ba pu ní bíǹ yaa púĺee, bi gbíntìi pɔ̄ɔ̄ ní?

8 Bi bí dimaŋfalin ní kí ká bi-biyaamu ń wíiǹ kí ká mpɔn,

bi bí gba kí ká bi-naantiibi.

9 Bi-dumpuyee, bi bí ŋgbansɔŋfin ní kaa nyí kufaaŋŋu.

Unimbɔti bambaaŋŋu kaa fátí-bi jaanjaan.

10 Bi-najaai yaa jɔ́m̀ isalee, i cāab̀ apoo ní,

i màal̀ i-biyaamu kaa làtī jaanjaan.

11 Bi-biyaamu sáń ki gbíiĺ kii kupicaŋkpuŋuee,

ní bi-naantiibi tɔ́ bi-ba ki ŋōō.

12 Bi bɔ̀ɔ́ agaŋgan nì tibati ní ki gà ilan.

Bi búǹ kiwulii ní ki gbíiĺ.

13 Nnaam poon ní bi bí

ní kí kpú nì ŋgbansɔŋfi.

14 Ama bi nìn tùkù Unimbɔti yii: «Yàntī-ti soooo,

taa là kí béé a nín là tí nīn bí puee.

15 Ŋma di sá Unimbɔti Mpɔŋkɔdaan ní tí nīn sá u-yumbui ní?

Ti yaa bíi mèé-uee, ba ní ti làá páatí ní?»

16 Binikpitib gbanti dàkafī yii bi-pɔŋŋu pu ní an bútì-bi,

ama maa là kí nīn bí kii bi nín bí puee.

17 Ni kāntí binikpitib kúù ŋkúntuntukumaaa?

Ni pée ká nnaabu jéetì bi-pu,

àá Unimbɔti dáaĺ bi-tafal u-ŋuul poon ki káaa?

18 Baa bí kii kumoou kun kubuŋu yòontée,

kaa tí bí kii kukpɔŋkpɔŋu kun kunaakpaabuŋŋu yòontée!

19 Ni lì yii Unimbɔti bɔ́ntì binikpitib gbanti

tafadaaldi ki cíitì bi-biyaamu ní.

Ama u yaa bàà dáaĺ bíǹ bi-ba tafal, an bàà cíikíǹ-bi!

20 An máaǹ yii binikpitib bi-ba ń ká bi-naabuŋu

ní kí dáká Unimbɔti Mpɔŋkɔdaan ŋuul kí kpèè.

21 Di sá yii unil maŋfal wiiŋyi yaa kúntèe,

u-biyaamu bɔti kaa ti ká-u.

22 Ŋma di ŋūǹ kí dàkà Unimbɔti tin u máaǹ kí ŋée?

Unimbɔti u-ba kaa sòoǹ ituun bɔtaaa?

23 Biba bí nnaam poon ní kí kpú,

bi bí ŋgbansɔŋfin ní tiba kaa páb́-bi.

24 Bi jíń tijimmɔntiil ki bí màlmal,

ní bi-kpabiŋ coom dáá sɔ̀m̀.

25 Ama biba muee, bi-maŋfal poon wiiŋyi pée sá ntuntun ŋma ní.

Baa pée ká nnaam ki dáká dalba dalba.

26 Ama bi-kɔkɔ kpíì ní bi síb́-bi,

ní akoosibil kpátìi bīiǹ bi-kɔkɔ pu.

27 M nyí tin ni dàkafēe tiŋan

nì ni nín cáá m-pu ilandɔkɔkpiti iŋyee.

28 Di sá yii ni lì yii: «Biwɔ́biliibi diiku bí la?

Bitɔŋfitiibi kɔŋkooŋŋu bí la?

29 Naa bàlifī bin còom̄ nsanee níii?

Naa là kí fōō tin bi sòoǹee kí kíí níii?»

30 Nnaabu wiiŋŋuee, tiba kaa ŋáań unikpiti,

Unimbɔti ŋuul pée yàntī-u ní soooo.

31 Ubɔ kaa bí kí kɔ̄kɔl̀-u,

ubɔ kpá kí pà-u u-tuuŋŋi paati.

32 U yaa kpíìyee, bi cáǹ-u kuceeun ní,

ní binib cí u-kaakul.

33 Ntam min bi làá dūú bìin̄ u-puee kaa nyìm̀ u-pu,

ní samaa kɔkɔ pá u-dakaau boon.

Bin līī u-nyɔkɔpuee kaa bí ŋkaan!

34 Mana ní ni dàkafī yii ni làá ŋmā kí dū

anyɔɔbun ŋin kaa cáá taapu nee kí ŋméeǹ-mi ní?

Ni nín kíikí-mi puee sá tinyimɔmbɔti ŋma ní.