Yoob 22

Eeliifaasi nín kíí puee: Yoob lafun fōō dibɔkpil

1 Niinee uteemanja Eeliifaasi kíí Yoob yii:

2 «Unil mun ŋūǹ kí kèetī Unimbɔtaaa?

Báà unil yaa cáá iciin, an sá kí kèetī úǹ u-ba ní.

3 A nín bí deedeeyee làá yàntī Unimbɔti Mpɔŋkɔdaan ń páatí ba?

Bi nín kaa kāntí a-pu tikpitil tibee làá kūtì-u ba?

4 «A dàkafī yii a nín fàŋkí unimbɔti puee ní u bíi wòoǹ-si,

àá ki bíi sòoǹ a-bɔtaaa?

5 An kaa sá yii a-yìntitam nín wīikí tikpilee pu,

àá a-kpitii nín kaa cáá ŋkaanee puɔɔɔ?

6 Kpèè, a nìn fōō a-juti cee toolima an kaa cáá taapu,

a nìn fōō u-wampeeŋkaati ní u kíǹ ki còom̄ ki gàaǹ^a.

7 Aa nìn tīī un nnyinnyoo cááyee nnyim u nyùn̄,

kaa tí tīī un ŋkùm nìn cááyee tijin u jíń.

8 Ama a nìn yāntì bipɔɔbi jíń kitiŋ

ní ki yāntì binigaakaabi kāl̀ ki-pu.

9 A jìn̄ bikpiipoobi iŋaŋkulim,

ní ki nāaǹ ditaŋkpiibil pɔŋŋu.

10 «An pu ní titalindi māntìi tú-si an kɔkɔ pu,

ní dinyoondi jéetì a-pu dicilpu dicilpu.

11 Kunyeeu mɔ́ ki bīiǹ a-pu ní aa ti wāĺ tiba,

ní nnyiŋkpaam gbí ki léeǹ a-pu.

12 Unimbɔti kaa bí yilpu atagbannaaa?

Kpèè kutagbɔŋu kun pu iŋmalbijaa kēe nín bí yilpu puee!»

13 Niinee ní a lī yii: «Tilati ní Unimbɔti ŋūǹ kí béé?

Atagban bīī u-pu, waa làá ŋmā kí sòoǹ ti-bɔti.

14 Atagban sá kii ŋŋaabiiŋkaa ŋun gbìfèe ní.

Unimbɔti yaa còom̄ kí màntīí tū kutagbɔŋuee,

waa wāĺ báà tiba.»

15 «A làá nīn gbíntìi còom̄ isaŋkpiki puɔɔɔ,

isan in ní binikpitib nìn cōom̀ee pu ní?

16 Bi-wiiŋyi kaa bà ní bí kpú,

a lì kii nnyiŋgbeen nín yòontí kudii puee ní.»

17 Bi nìn tùkù Unimbɔti yii: «Yàntī-ti soooo!

Ba ní Unimbɔti Mpɔŋkɔdaan ŋūǹ kí ŋá-ti ní.»

18 Úǹ mun di nìn gbéeǹ bi-diiŋŋi tiwammɔntiil.

Maa ŋūǹ kí gbìl̄ binikpitib bimbim taapu^b.

19 Deedeedambi làá ká bi-naabuŋu ní kí nīn fàal̀,

maanyiibab làá nīn bèel̄-bi ki lì yii:

20 «An nāaǹ ti-nannanliibi,

ŋŋmi wùn̄ bi-gaajati.»

21 Si nì Unimbɔti ń mɔ̄ɔkì ní kpántí bibɔɔtiibi,

a yaa ŋá míǹ, án làá fàtīí bútí-si.

22 U nín dàkà-si puee, fōō míǹ

ní kí dū u-nyɔɔbuŋŋi kí ŋá a-pɔbilin.

23 «A yaa fātìi gítìń Unimbɔti Mpɔŋkɔdaan cee,

u làá fōō-si kí fàtīí gíiǹ-si kí kàan̄

mpaan ŋun pu a nìn bí dooooyee.

Nyāntí tin kamaa kaa bí deedeeyee a-kɔŋkooŋŋun.

24 Dū a-sindaariyau kí lúkú kitiŋ,

àá á dū-u kí bíĺ mbun taŋkpeeŋi kansikin.

25 Unimbɔti Mpɔŋkɔdaan

làá kpántí a-sindaariyau nì a-nimbiliŋ dikpúkul.

26 An yaa ŋá mimmee, a làá ká a-mɔŋŋu

Unimbɔti Mpɔŋkɔdaanni,

ní kí kpèè Unimbɔti nimbiin nì dimákal.

27 A yaa mēē-u, u làá pīlifiǹ-si,

ní á dāá ŋá kii a nín pōoǹ yii a làá ŋá puee.

28 Án làá bútí-si tin kamaa a yaa lēē kí ŋée poon,

ní ŋwalifi ń nīn ŋmíntí a-saŋŋu pu.

29 «Di sá yii Unimbɔti nàantí bilambidambi tuuŋŋi,

ama u fìil̄ unil un di sīntì u-ba taapuee ní.

30 Kii Unimbɔti nín fìil̄ maanyiibab puee,

míǹ ní u làá fīī-si a nín ŋá tin kítèe pu.»