Yoob 23

Yoob nín kíí puee: Unimbɔti kaa là man nì u ń sòoǹ

1 Niinee ní Yoob kíí yii:

2 M gbíntìi bíi jáà nì Unimbɔti ki yáliŋkí díǹ,

m-yaliŋkii dáá gbíntìi pɔ̄ɔ̄.

3 M yaa bàà ŋūǹ kí béé laakin Unimbɔti bée,

m bàà làá tin gbàtī u-beejal nimbiin ní!

4 M bàà làá dū m-bɔti kí bíĺ u-nimbiin,

ní kí sòoǹ kí cántí m-bɔti nee taapu kɔkɔ kí tùkù-u.

5 M bàà làá béé u nín làá kíí-mi puee,

ní kí gbìl̄ tin u cáá kí tùkù-mee taapu.

6 Unimbɔti kalin làá dū u-pɔŋŋu kɔkɔ kí jáǹ-mi níii?

Aayee! Úǹ làá pīlifiǹ-mi.

7 Ubulcinnil ŋūǹ kí sòoǹ nì u u-bɔti niin,

ní Unimbɔti un sá m-bɔsoonliuee ń pɔ̀-mi kí nīn cáa cá talku.

8 Ama m yaa nín cá ŋwìiń nyalaŋki púɔɔɔ,

Unimbɔti kaa bí niin.

M yaa tí nín cá ŋwìiń jeetilaŋki púɔɔɔ, maa kāntí-u.

9 U kalin bíi tūǹ ditundi ŋgan pú níii? Aayee, maa wāĺ-u.

U kalin bál̀ ŋgiil pú níii? Maa wāĺ tiba.

10 Ama u nyí nsan ŋun poon m còom̄ee,

u yaa cɔ́ŋkì-mi, m làá nyā dándan kii sindaariyee ní.

11 M-taaŋi pée tàkā u-tabɔbiliŋin ní,

m pée ŋúb́ u-saŋŋu ní kaa kpēeǹ ki cūtì laaba.

12 Maa fātì m-boon ki tīī u-marab,

m kpáafì u-bɔkpaaŋi kɔkɔ m-pɔbilin.

13 Ama úǹ di lèekī tin u làá ŋée.

Ŋma di ŋūǹ kí yàntī ú kpántí nlandɔkɔ?

Kun mɔ̄ǹ-uee ní u ŋáań.

14 Tin u bɔ́ntì kí tīī-mee ní u làá ŋá,

ní u bɔ́ntì tiwan tikpil kí tīī-mi.

15 An pu ní m bí dinyoondi poon u-nimbiin.

M yaa bíi dàkafī tin bí nee kɔkɔ puee,

an cútí-mi tifaandi ní.

16 Unimbɔti bíil̀ m-pɔbil,

Unimbɔti Mpɔŋkɔdaan fāaǹ-mi.

17 Min kamaa dibɔmbɔndi bée,

min kamaa kunyeeu mɔ́ m-puee, maa ŋmíl̀.