Yoob 24

Ba pu ní Unimbɔti ŋmí ki kpèé unikpiti ní?

1 Ba pu ní Unimbɔti Mpɔŋkɔdaan kaa síiǹ

ŋwiin ŋubɔ kí sòoǹ binib bɔti ní,

ŋwiin ŋun ní deedeedambi làá kée ní?

2 Binib bí ki cóotí bi-kpaanyɔmmu taŋkpeeŋi ki nìkì^a,

ní ki ŋúb́ ipii in bi yùn̄ee ki kpàá.

3 Bi fòol̄ ditaŋkpiibil maŋki

ní ki yòontí ukpiipu naau toolima.

4 Bi kàkatī binandambi ki wàatī nsan,

ní ki páb̀ bifalaadambi bi sáń ki bāal̀.

5 Bifalaadambi bí kii kumooun mammu

mun di cá kuteeun kí nyàab̀ mu-jintee ní.

Nsan ŋun baba pu bi ŋūǹ kí ká tijin kí tīī bi-biyaamuee dee.

6 Biba saakun ní bi cá ki cēē timool

ní ki lúlifí utɔŋfiti fiinyi kpaabun.

7 Ama baa cáá sata kí bìin̄ kunyeeu,

tiwool yaa bée, baa cáá satabiiŋkaa.

8 Utaa un nyánní dijool pu ki sɔ̀m̀ee di gbáà-bi.

Bi nākantí ataŋkpee pu, di sá yii baa cáá ŋkɔŋkoon.

9 Binikpitib bàbitī ditaŋkpiibil di-na biil pu.

Bi yòontí usoodaan bipɔŋki toolima kí pà dipɔndi.

10 Baa cáá tiwan kí pèen̄ ní bi yàntī bi còom̄ ki gàaǹ,

bi yàntī bi tūntí bilee abɔn abɔn, kaa jíń tiba.

11 Bi yàntī bi ŋmāam̀ ɔliifi biliŋ ki nyāntí ŋkpam,

ki yàntī bi ŋmāam̀ fiinyi biliŋ ki nyāntí ndaam,

ama ní nnyinnyoo làá kpɔ̀-bi.

12 Binib bí ki yáliŋkí kitiŋin,

bin fōō tiweendee bíi gbáà ibiil ki yíì Unimbɔti ń jòoń-bi,

ama atuŋkpiti gbanti kaa sòoǹ Unimbɔti tiba!

13 Bin tūǹ atuŋkpiti gbantee kaa là ŋwalifi bɔti.

Baa nyí ŋwalifi saŋyi,

kaa tí dì ŋu-sàmbiyaamu.

14 Unikpɔl yíkí ntaafaabɔmbɔm

ní ki kù usoodaan nì unandaan,

ní kunyeeu yaa mɔ̄ee ní ú kpántí unaayuu.

15 Uninja un nyēē u-nimpuu boonee

cí kunyeeu yaa bíi móotée

ní ú lì yii: «Ubɔ kaa làá wāl̀-mi».

U lī mimmee ní kí nyàab̀ tiba kí bìin̄ u-nimbiin.

16 Kunyeeu ní unaayuu cífí adiin,

ama kutaa yaa wúntèe ní ú dūú pìin̄ u-ba pu u-diikun.

Ŋwalifi sá tiwancan ní ki tīī-u.

17 Bíǹ gbanti kɔkɔee, kutaafaau sá kii ŋkúm bɔmbɔndee ní,

di sá bi mántì nì kunyeeu tumbilinti ní.

18 Ni lì yii: «Binikpitib bí kii tiwan

tin dēē nnyim pu mì cáa féeńee ní.

Unimbɔti tɔ́ bi-kpaatanti mbusu,

baa ti cá bi-fiinyi kpaaŋŋin ki tūǹ ditundi.

19 Kii ŋwìiń nín gbáà ntaayim pu

mí dùntī kí wāŋkì puee,

míǹ ní binikpitib wáŋkí kí cù ditaŋkpiilin.

20 Unimpu un màl̄-bee kaa ti téetí bi-pu,

bi kpántí diina jinti ní kí tīī akoosibil,

baa ti pée sòoǹ bi-pu.

Bi nàn̄ ikpiti dúsi dusi kii ndɔee ní.

21 Binib gbantee nìn sāaǹ unimpuŋmaŋŋmanti

un kaa nìn ŋúń ki màl̄ee,

ní kaa dàkā bikpiipoobi kulaŋŋaŋfitiiu.

22 Ama Unimbɔti cáá mpɔn kí nyāntí bipɔndambi.

U yaa yíkì bi-puee, baa ti làá nīn máká kí nīn bí dimaŋfalin.

23 Unimbɔti pée yàntī bí nīn bí ŋgbansɔŋfin ní,

ama ní u-nimbikpeeŋu pée cɔ́ bi-saŋkindi pu.

24 Binib gbanti pée yíkí ŋyunti ŋubɔ fiii ní,

ama boonee an dóò bi-pu dee.

Bi làá tìntī bi-yil kii nsupumpukum min bíi kúùyee ní,

bi làá cā-bi kii bi nín cēē idifin puee ní.»

25 M yaa mɔ́ntì, ubɔ ń dàkà-mi yii m mɔ́ntì,

udaan ń dàkà yii tin m sòon̄ee kaa sá míǹ.