Yoob 26

Yoob nín kíí Biilidaadi puee

1 Niinee ní Yoob kíí yii:

2 A nyí bi nín tútúǹ un kaa ti cáá mpɔnee pueeyeeee!

A nyí bi nín jòoń uwɔfi puee páaa!

3 A nyí bi nín tìì un lóò iciinee isaŋki pueeyeeee!

A nyí bi nín dàkà dinyil puee an kaa cáá bí lì!

4 Ŋma ní a sòoǹ anyɔɔbun nee ní?

Ŋma cee ní a ká tin a sòoǹ nee ní?

Unimbɔti cáá duulinya kɔkɔ pu mpɔn

5 Ditaŋkpiilin Inyiŋfi taapu nì bin kóò niinee,

bin kpíìyee fam bíi jìkì.

6 Ditaŋkpiilin dɔ̄ mpaampiin pu ní Unimbɔti nimbiin,

tiba kaa ŋūǹ kí lìkin̄-u ú taa wāl̀ tin bí niinee.

7 Unimbɔti di kpátì kutagbɔŋu ki dāntì ŋgan pú tiba kaa ŋúb́

ní ki dū kitiŋ ki dāntì laakin tiba kaa bí ki tíkée.

8 U dū ntaanyim ki póob́ atagbanni,

ní nnyimee nyiŋfiŋu kaa yàntī atagbanee ń pōō.

9 U kpátí atagban

ki bìintí u-beejal pu.

10 U lūtì kulaguŋu ki tú inyiŋfi,

laakin ní ŋwalifi kúntí dibɔmbɔndee.

11 Unimbɔti yaa tāā ki bíikèe,

kutagbɔŋu jaantalkub fàŋkí ní ki cìŋkī.

12 Unimbɔti dū u-pɔŋŋu ní ki jáń ki fōō tiŋku,

ní ki dū u-nyil ki jáń ki pɔ́ɔkiǹ

kupeebiliŋŋu kun bí nnyimin bi yíì Raabee.

13 U-fooku ŋātì kutagbɔŋu,

u dū u-ŋal ki sāā ki pūntì

kukoowambiiu kun kóò nnyiminee^a.

14 Tin kɔkɔ m sòon̄ní nee sá u-tuuŋŋi kijaŋ kiba ní,

tin u ŋá ti nyée sá kii bi nín lɔ́kɔfí unil tafal poon puee ní,

ŋma di ŋūǹ kí béé kí cíĺ Unimbɔti nín baasii sá ukpaan miŋyee?