Yoob 27

Yoob bíi mɔ́tí u-ba pu

1 Yoob nìkī ki sòon̄ yii:

2 Nì Unimbɔti un bí dimaŋfalin

kaa là kí pɔ̀-mi nee yindi puee,

nì Unimbɔti Mpɔŋkɔdaan un cɔ́tì m-poon kaam nee yindi puee,

3 m pūtì yii m nín dáá cáá kufoou m-ni,

Unimbɔti fooku nyēē m-maŋfataabuŋyin nee,

4 m-nyɔkɔ kpá kí sòoǹ tibɔkpitil,

m-limbil kpá kí sòoǹ tinyimɔmbɔti!

5 M kpá kí tīī-ni ibaamɔn.

M kpá kí lì yii m fōō dibɔkpil kí cáá sāā ŋkúm dal.

6 M gbíntìi ŋúb́ yii m bí deedee,

ní m kpá kí kɔ́ntí m-nyɔkɔ,

m-landɔkɔjaatiŋu kaa làá kɔ̄kɔl̀-mi dalba dalba.

7 Unimbɔti ń dáaĺ m-nannanliibi tafal kii binikpitibee.

Ú dáaĺ bin jáà nì mee tafal kii digaŋgam dambee^a!

8 Unikpiti gíti máká ba pu

ŋyunti ŋun ní Unimbɔti lēē u-maŋfalee?

9 Dinimbinaamandi yaa jéetì u-puee,

Unimbɔti gíti pílifí u-biiliiyaaa?

10 U kāntí u-mɔŋŋu Unimbɔti Mpɔŋkɔdaannaaa?

U nìn mèé Unimbɔti ŋyunti kamaaa?

11 M làá dàkà-ni Unimbɔti pɔŋkpaaŋŋu,

maa làá báĺ-ni Unimbɔti Mpɔŋkɔdaan landɔkɔi.

12 Ni-kɔkɔ dáań ki ká míǹ ni-ba.

Kin ba pu ní tin ni sòoǹee kaa cáá taapu míǹ?

Kun Unimbɔti bɔ́ntì ki cíitì unikpitee

13 Kpèèmaan kun Unimbɔti bɔ́ntì ki cíitì unikpitee,

kun ní Unimbɔti Mpɔŋkɔdaan bɔ́ntì ki cíitì bipɔndambee:

14 Báà u-jipɔmbi yaa būtì, dikɔ̀ndin ní bi làá kpɔ̀-bi,

ní u-naantiibi ń dāá lóó tijin.

15 Bìlbil kúm di làá dāá kpɔ̀ bin kíǹ kaa kpíìyee,

bi-kpiipoobi kaa làá dāá ŋmā kí kàl̄ bi-kpool kí sɔ̄.

16 Báà unikpiti yaa kōontí animbil ki kpūkuntí kii ŋkpɔŋkpɔmee,

àá ki kpūkuntí tiwampeeŋkaal kii kuyɔkɔuee,

17 ú nīn gbíntìi nìkì ki kpūkuntí!

Deedeedaan ubɔ di làá dāá pèen̄-tì,

ubulcinnil di làá dāá jī u-nimbiliŋ.

18 Kudii kun unikpiti māāyee náań nì kii tinaŋgbantalindee ní,

a lì kii kibiŋ kin un cí bukpaayee gāāyee.

19 U kóò kí dòon̄ ki sá ugaaja, ama ní an sá u-luŋkikaam,

u dāa yíkí kí ŋúbití u-nimbiliŋee, báà tiba kaa ti bí.

20 Dinyoondi làá jēetí u-pu kii nnyiŋgbeen

nín lēentí unil pu waa nyí puee ní.

Kunaakpaabuŋŋu làá yòon̄-u kunyeeu.

21 Ŋwìiń nyalaŋki pú buŋku làá yòon̄-u kí cáá tɔ̄ kí fá ndandati,

ku làá yòon̄-u mpɔn u-kɔŋkooŋŋun.

22 Ku làá nīn fátí-u kaa làá sɔ̄ u-saai,

see ú dāá pɔ́ɔǹ kí sāǹ-ku kí ŋmátí.

23 Bi làá dāá kpāafì iŋal kí bèel̀-u,

laakin u kóòyee, bi làá dāá nīn búǹ ifoon ki lāā-u.