Iciin nyánní la ní?
28
1 Tiŋman, an cáá laakin bi gbì kí ká animbilee,ní ki cáá laakin bi gbì sindaariya ki fíntí-uee.
2 Bi gbì kitiŋ ní kí nyāntí tikúti,
ní kí dùntī ditaŋkpal kí nyāntí tasa.
3 Binib yòontí ŋwalifi ní kí kɔ́ kitiŋ taapu.
Bi gbì ní kí kɔ́ kitiŋ taapu taapu
ki nyàab̀ ataŋkpee dibɔmbɔndin.
4 Laakin binib kaa kóòyee, bi gbìn̄ ifal kii tumbuŋku faliiyee,
laakin unil taal kaa pée tāā ki kée,
binib lúń iŋmii pu ki fīintí.
5 Kitiŋ yilpu lòon̄ tikpaajin,
ama ní kitiŋ taapuee, a lì kii ŋŋmi lábitì tikɔkɔ ki cìb̄ee.
6 Kitiŋ taŋkpeeŋin ní ataŋkpamɔnti ŋin bi yíì safiiree bí,
ŋi poon ní bi kāntí sindaariya kpɔŋkpɔm.
7 Ikaabu kaa nyí kitiŋ taapu saŋyi gbanti,
ikaalun nimbil kaa wál̀-i.
8 Ipeecuncuti taal kaa tāā isan gbanti pu ki ká,
míǹ ní gbikinti mun kaa nóó-i ki ká.
9 Ama unil gbì ditaŋkpal din pɔ̄ɔ̄yee,
u gbì ajoon kí tin bà ŋi-taapu.
10 U gbáń ki wīī ditaŋkpal ki gbìn̄ ifal,
tin kɔkɔ sá tigaajawanee, u-nimbil wāĺ tikɔkɔ.
11 Bi gbíŋkí ibun nyimbulnimbiliŋ
ní kí nyāntí tin nìn bí dibalinee kí páań mpaampiin pu.
*
12 Ama la ní bi ŋūǹ kí ká iciin?
La ní dinyil bí ní?
13 Iciin kaa bí binifoobi tiŋkin,
an puee binib kaa nyí i-nyampooku.
14 Tiŋkukpaan bí yii: «Iaa bí doo»,
ní dimɔɔl mun bí yii: «Iaa bí m-cee.»
15 Baa ŋūǹ kí dū disindaariyakúndi kí kpántí-i,
baa tí ŋūǹ kí ŋmàntī animbil kí dūú dā-i.
16 Sindaariyamɔnti kaa cá i-cee,
míǹ mbaantiim ní ataŋkpamɔnti mun kaa cá i-cee.
17 I cáá kunyampoou ki jítiǹ digitil nì sindaariya,
baa ŋūǹ kí dū sindaariyamɔnti disambil kí dā-i.
18 Baa tí sòoǹ atakpamɔnti ŋin bi yíì kooraal nì kriistaalee pu.
Unil ń nyàab̀ iciinee sɔ́ǹ ú nyàab̀ abeedimbil.
19 Eetiiyoopii tiŋkin taŋkpamɔntiil
din bi yíì toopaasee kaa cá i-cee.
Taa ŋūǹ kí dū sindaariyamɔmmɔnti kí ŋmàntīǹ-i.
*
20 Ama la ní iciin nyánní ní?
Dinyil kɔŋkooŋŋu bí la ní?
21 Bi dū-i ki bál̀ binifoobi kɔkɔ,
ki dū-i ki bál̀ unoon un ŋàaǹ kutaa puee.
22 Ŋkúm nì ditaŋkpiilin bíi lì yii:
«Ti gbìl̄ bi sòon̄ i-pu.»
23 Ama Unimbɔti nyí nsan ŋun pu bi dì kí ká-iee,
úǹ baba di nyí laakin bi ŋūǹ kí ká iciinee.
24 Di sá yii u-nimbil làaǹ kitiŋ kɔkɔ pu
ní ki wāĺ tin kɔkɔ bí ki-puee.
25 Ŋyunti ŋun u tīī kubuŋu ku-nyiŋfiŋu
ki ŋmāntì inyiŋfee,
26 ŋyunti ŋun u tīī utaa laakin u làá nīn nì ki gbèentée
ní u cátì nsan ŋun ditaadundi làá nīn dèe,
27 ŋyunti gbanti ní u ká iciin ní ki béè i-nyampooku.
U nìn cɔ́ŋkì-i ní ki béè i-daaku.
28 Niinee ní u bí binib yii:
«Á fàŋkì ti-Dindaanee di sá iciin!
Á fàtī a-boon kí tīī tikpitilee di sá dinyila!»