Yoob 29

Yoob nín kíí pu ki lúŋkèe

1 Niinee Yoob fātìi kíĺ ki bíi sòoǹ ní ki bí yii:

2 M yaa bàà ŋūǹ kí fàtīí gítí kii m nín nìn bí puee,

ŋyunti ŋun m nìn bí Unimbɔti cí-mee,

3 ŋyunti ŋun ní u-walifiŋu nìn ŋmíntí m-yil yilpuee!

U-walifiŋu nìn tútúǹ-mi ḿ còom̀ kí jītí dibɔmbɔndin.

4 Ŋyunti gbantee, m nìn dáá cáá mpɔn,

Unimbɔti nìn píí-mi kubɔɔtiiu ní ki nìn wúń m-dicaŋku pu.

5 Unimbɔti Mpɔŋkɔdaan nìn dáá bí m-cee,

ní m-jipɔmbi nìn sí ki māntìi tú-mi.

6 Ŋyunti gbantee, m nìn dēē digbilin ní,

ŋkpam nìn còol̀ ditaŋkpal din pu bi ŋmāam̀ ŋkpamee.

7 M yaa nìn nyáń kitiŋ punyɔkɔpu

ki cūtìi kāl̀ kí sòoǹ tibɔti,

8 ní binipɔmbi ká-mee, bi nìn pàatī ní,

bitikpilib nìn yíkí ní kí yūĺ.

9 Abɔtibil yaa nìn bíi sòoǹee, bi ŋmīlifí

ní kí dū bi-ŋalii kí bìin̄ bi-nyɔmmu pu.

10 Bikpilib nìn ŋmīlifí

ní bi-nyɔmmu ń kpú.

11 Un yaa nìn gbìl̄ m sòon̄ee pàkà-mi ní.

Un yaa nìn ká-mee nìn lèekī m-pu seera ní.

12 Usoodaan yaa nìn fáá mbiilee, m nìn jòó-u ní,

ní ki nìn jòó ditaŋkpiibil din kaa nìn cáá ubɔ ń tūtuǹ-uee.

13 Un nìn kúùyee nìn mèé ki bìintí m-pu ní.

M nìn tìì bikpiipoobi dipɔɔpindi.

14 M nìn dū tin bí deedeeyee ki pēeǹ kii dibɔkutilee ní.

M-bɔkutikpaandi di nìn sá ḿ sòoǹ tibɔti nì ibaamɔn.

15 M nìn sá animbil ní ki tīī ujɔfu,

ní ki sá ataa ki tīī ufaliŋfaan.

16 M nìn sá ubaati ní ki tīī unandaan,

ní ki nìn mɔ́tí unicaan pu ibɔsoon poon.

17 M nìn gbáà ki wìil̄ bikpitiŋaliibi nyɔɔkpaweeŋyi,

ní kí fōō un u cúú ki làá tɔ̀ntēe kí nyāntí u-nyiŋŋin.

18 M nìn lī yii: «M làá kàl̄ kitiŋ pu kí yúntí,

ní kí kpú man m-ba diikun.

19 M bí kii busubu bun nyaaŋyi dēē nnyiminee ní,

kunyeeu malindi sɔ̀ŋkī m-supampɔmbiliŋ.

20 M làá fàtīí ká m-nyooti mpɔmin,

ní m-tɔbu ń fàtīí pɔ̀ntī m-ni.»

21 Binib nìn cīití-mi ní ki pílifí tin m sòoǹee,

bi nìn ŋmīlifí ní díkí diki kí pīlifì m-saŋkii.

22 M yaa nìn sòon̄ ki dóòyee, ubɔ kaa nìn kpākantí,

m-nyɔɔbuŋŋi nìn mɔ̄ bi-cee kii ntaanyim nín jòotī puee ní.

23 Binib nìn cīití-mi kii bi nín cīití utaa puee ní,

a lì kii bi nín cīití umɔfiintaa puee.

24 M yaa bíi lāā-bi méemeeyee, an nìn ŋáań-bi bitii ní,

di sá bi nìn nyàab̀ kí ká m-nimbiin kulaŋŋaŋfitiiu daaŋku.

25 Man di nìn sá bi-kpootiliu ní ki dàkà-bi nsan,

m nìn bí bi-kansikin kii ubɔti un u-janjaliibi māntìi túee ní,

m nìn ŋmēentí-bi kii bi nín ŋmēentí bin kā dikpoolee puee ní.