Yoob 30

Díǹ falaau

1 Ama díǹ nee, man ní binib bèel̄,

binib bin man kpíǹee,

binib bin baabi kaa nìn sàafì

kí nīn bí m-booi kansikinee.

2 Ba ní an nib gbanti nìn ŋūǹ kí ŋá kí tīī-mi,

di sá yii baa nìn gíti cáá mpɔn ŋubɔ?

3 Ŋkùm nì falaa nìn yāntì binib gbanti kaa nìn gíti cáá mpɔn,

ní ki nìn nyàab̀ tiba kí jī kitimpiliŋ kin wāā tiba kaa bí ki-pu nan ní.

4 Bi nìn lòol̄ nsugboomu faati,

ní ki nìn ŋmóò isunyaan.

5 Báà ŋma nìn dū-bi ki fá,

ní bi nìn jì-bi ki tátí kii digaŋgam dambee,

6 Bi kɔŋkooŋyi di nìn sá ibun in fóotèe poon

nì ifal in dɔ̄ kitiŋee nì itaŋkpalɔkɔn.

7 Bi nìn dɔ̄ timool pu ki nyīī tɔb pu,

bi nìn gbìl̀ bi sūǹ nsugboomun kii ipeelee.

8 Binib bin kaa bí tiban ubɔ kaa nyí bi-yiŋŋee,

bi dū idɔ ki jìn̄-bi ki nyántì kitiŋ pu.

9 Ama kɔŋkɔnnee, man ní bi kíǹ ki cáa gà ilan,

man di kpántì mmaam wanti ní bi cáa gbáà faawii.

10 Bi núutì-mi ní ki sáń-mi,

bi tíiĺ ki làbitī-mi an kaa páb́-bi.

11 Kun puee Unimbɔti gbáń ki kpātì m-tɔŋmiiŋu ki nāaǹ-mi,

bi yaa wál̀-mee, bi ŋáań bi nín là puee ní.

12 Dinikitil nee bíi jáà nì mi m-ŋaŋgiil pú,

bi gāā-mi kinaakpaatakai ki nyàab̀ ḿ lítí.

Bi bíi jáà nì mi ki là ḿ wāŋkì.

13 Bi gāā ki kíntì-mi

ki pée nyàab̀ kí nàan̄-mi,

bi-kansikin ubɔ kaa nyàab̀ ditutundi.

14 Bi sāā ki cíl̀ digundi din cí-mee ki bìl̄ ki kɔ́ m-pu,

bi dì adigbuŋkati pu ki dòoń m-cee.

15 Dinyoondi kùl̄ ki kāl̀ m-pu,

ki ŋātì m-nyooti kii kubuŋuee.

M-jajil mákal wáŋkì kii ditagbandee.

16 Kɔŋkɔnnee falaa di māntìi tú-mi,

diŋuŋfil kaa ti pée bí-mi báà fiii.

17 M-kpabiŋ kɔkɔ wù ní kunyeeu,

an kaa pūǹ-mi nsan ḿ gèeǹ gba.

18 Unimbɔti cúú m-wampeeŋkaati mpɔn

ki dáaĺ ki síkí m-sil.

19 U téé-mi ki tɔ́ tikpatin,

m kpántì kii ntam nì ŋfantamee ní.

20 M-Nimbɔtiu, m bíi kūuntí ki yíì-si, ama ní aa bíi kíikí-mi.

M yú a-nimbiin, ama ní aa fātìi tɔ́ gba yii unil sí.

21 A kpántì tuutuutuu ní ki tīī-mi,

a cáá a-pɔŋŋu kɔkɔ ki sàantí-mi.

22 A yāntì kubuŋu yōoǹ-mi ki cáa tɔ́ ki fá,

ní ki yāntì kubuŋkpaaŋŋu cáá-mi ki yāŋkí an kɔkɔ pu.

23 M pée nyí a nín cáá-mi ki cáǹ ŋkúminee,

laakin ní binifoobi kɔkɔ cée.

24 Ama an yaa bíi nàantí unil,

waa tàntī u-ŋal kí nyàab̀ dijòońdaaa?

Dinimbinaamandi poonee,

unil kaa gbáà ibiil bí fīī-uaaa?

25 Maa súń bin nìn bí dinimbinaamandi poonee puɔɔɔ?

Bifalaadambi bɔti nìn kóò-mi inimɔɔn ní!

26 M nìn kā ki cí nnaam, ama nnaabu ní m dāa ká.

M nìn kā ki cí ŋwalifi ní dibɔmbɔndi dɔ́miń.

27 M-pɔbil bíil̀ ki bíi gbáà mpɔn,

falaa wiiŋyi ŋmaniŋma poon ní m bí.

28 M bɔ̄ntì, ama an kaa sá ŋwìiń di gbáń-mi ní m bɔ̄ntì!

M sīlifí samaa kansikin ní ki gbáà ibiil bí jòoń-mi.

29 M-biilii yāntì m kpántì sinsiŋkub bɔɔ,

ní ki kpántì itulinjaa naalib.

30 M-wuŋgbaŋŋu bɔ̄ntì ki kíǹ ki nákatíi lítí.

Nnaanyeem yāntì m-wunti píĺ kpaŋkpam.

31 M-beeku kíǹ ki gà ikpiisilan ŋma ní,

ní m-wuliiki búǹ ki cēentí bin gà ilan ki sūǹee.