Yoob 31

M-yil gáań Unimbɔti nimbiin

1 Man nì m-nimbiliŋ ŋá mpèé ŋubɔ yii

ŋí taa kpèè usapɔɔn nì kɔdeei.

2 Ba paati ní m cí kí fōō Unimbɔti cee?

Ba ní Unimbɔti Mpɔŋkɔdaan bɔ́ntì ki cíitì unil doooo yilpu ní?

3 Ni lì yii: «Nnaabu dɔ̄ ki cí unikpiti,

dinàandi dɔ̄ ki cí ukpitiŋal.»

4 Too, Unimbɔti kaa kalin wāĺ m-saŋkindi níii?

U kàaǹ m nín dúkutí m-taaŋi puee kɔkɔ!

5 M dī inyimɔn saŋŋuaaa,

m-taaŋi yáb́ ki cūtìi mūul̀ m-jutaaa?

6 Unimbɔti ń sòoǹ m-bɔti nì ibaamɔn!

Waa làá ká tiba m-pu.

7 M-taaŋi yaa nyáń nsammɔnti poon,

m-nimbiliŋ yaa kpēē tiba ki yāntì an cúú-mi nnimbitaataam,

m-ŋalii yaa ti ŋá atuŋkpiti aba ki kɔ́ǹ-mi tijɔkɔndinee,

8 Unimbɔti ń yàntī m yaa kùn̄ ki búĺee, ubɔ ń dāá cā kí jī,

àá ú fùkù tikpaajin tin m cóoǹee!

9 M-bɔɔ nimpuu yaa kɔ́-mi

ní m cūtìi nákáǹ m-bɔɔ punyɔkɔpu ki cíitì-uee,

10 man m-ba nimpuu ń kpántí uninja ubɔ tɔntɔnliu,

ní uninja un yaa pée lèe ń dòon̄ nì u!

11 M yaa ŋá mimmee, m ŋá ticoobɔti dee,

ikpiti in di máaǹ ditafadaaldee.

12 M-yìntitam ń bàà kpántí kii ŋŋmee

kí wà kí nàan̄-mi,

ní kí wà tin kɔkɔ m cááyee.

13 M-tɔntɔnliu uninja àá unimpu

yaa dɔ́miń m-cee ki yáliŋkì

ní maa pílifiǹ-u ki ŋá tin u nyàab̀ee,

14 Unimbɔti yaa làá dāá sòoǹ m-bɔtee, m làá dāá ŋá mana?

U yaa láa dɔ́miń ki cɔ́ŋkì-mi, m làá dāá kíí-u yii ba?

15 Unimbɔti un máń-mi ki tākaǹ m-na poonee di kaa náań bi muɔɔɔ?

Úǹ di náań ti-kɔkɔ ki tākaǹ ti-nab pooŋyin.

16 Maa yíì dalba dalba kí tīī unandaan kun u nyàab̀ee,

kaa ti yāntì ukpiipu kāl̀ ki cíitì fám.

17 Tijin tin m cááyee, maa jíń-tì m-baba,

man nì ataŋkpiibil di dūu yākatì ki jíń.

18 M kpántì kii ditaŋkpiibil baayee ní doooo m-biyatin,

ní ki pée mɔ́tí ukpiipu pu kaa gbèentí.

19 M yaa nìn ká usoodaan kaa cáá tiwampeeŋkaal,

àá unandaan kaa cáá sata kí bìin̄ee,

20 see ḿ nìn nyàab̀ sata un bi dū

m-piii kuti ki lùn̄ee kí tīī udaan ú bìin̄.

M yaa nìn ŋá mimmee, u nìn jáaḿ-mi ní.

21 M yaa dúkutì m-ŋal ki ŋá ditaŋkpiibil tiba,

min kamaa m nyí yii bibɔsoonliibi kɔkɔ pá m-boonee,

22 m-gbigbipeeu ń bátí kí lítí kí wàatī m-peeku,

ní m-ŋal ń tùkutī ŋŋalkpancɔ nyɔkɔm!

23 Di sá yii m nìn fàŋkí Unimbɔti tafadaaldi,

maa nìn ŋūǹ kí yūĺ u-nimbiin.

24 M dū m-mákal ki páaǹ sindaariya puɔɔɔ?

Àá m lī dalba yii: «sindaariya, sii di sá m-wundaaa?»

25 An kaa sá m-gaajakpaanti di nìn tìì-mi mmɔn,

àá tin m nìn bìn̄ ki nyàab̄ ki kée.

26 M nín ká ŋwìiń bíi ŋmíntí

ní uŋmal bíi còom̄ ki cée,

27 an kaa ŋmātiǹ-mi dibalin,

ḿ dū-bi kí kpántí inimbɔti kí nīn jáaḿ.

28 M yaa bàà nìn ŋá mimmee,

m bàà nìn ŋá ikpiti dee ní m-bɔsoonliu bàà máaǹ kí dáaĺ m-tafal.

Di sá yii m bàà nyáń Unimbɔti Mpɔŋkɔdaan boon dee.

29 Asaluu gbáń m-nannanliu m fàal̄aaa,

àá nnaabu ŋun jéetì u-puee tīī-mi mmɔn?

30 Maa nìn ŋūǹ kí yàntī ikpiti ń nyā m-nyɔkɔn

kí mèè mbusu kí tɔ̄ u-pu yii ú kpú.

31 Binicambi bin nìn kɔ́ m-puee kaa nìn lì yii:

«Ŋma di dɔ́miń Yoob dumpu kaa ŋmɔ́ tinan ki díkí?»

32 Maa nìn yàntī unicaan ń dòon̄ mmɔŋki kutaa ń wúntí u-pu,

di sá yii m nìn pée fòol̄ binicambi m-dumpu ní^a.

33 M dū m-kpitii ki bál̀ kii binib tikpil nín ŋáań pueeee?

M dū m-kpitii ki bál̀ m-naaa?

34 Maa nìn fāŋkì tin bin kíǹee làá sòoǹ m-puee.

Bi nìn ŋūǹ kí bèel̀-mi, ama tíǹ kaa nìn ká-mi,

àá kaa nìn tí pīiǹ m-nyɔkɔ àá kí pìin̄-mi nsan ḿ taa nyā.

35 Ubɔ kaa pée bí kí pīlifiǹ-mi deeyaa!

M-bɔjoolkaati sɔ̀. An kíǹ Unimbɔti Mpɔŋkɔdaan nín kíí-mi!

An yaa kíǹ m-nannanliibi nín ŋmàn̄ tin kí kɔ̄kɔl̀-mee,

36 m làá dūú bùkun̄ m-gbigbipati pu,

m làá dūú ŋá kii kibeefuuliiyee ní kí cíkiń.

37 M làá tùkù Unimbɔti tin kɔkɔ m ŋée,

m làá dāá còom̀ kii dibɔtibilee ní kí yūĺ u-nimbiin.

38 M-kpaatanti bíi yáliŋkí m-puɔɔɔ?

M yāntì ipɔn in m cátèe súńaaa?

39 Maa fìkī ubɔ kpaajinti,

kaa tí yāntì ti-dindambi kpíì ŋkùm.

40 M yaa ŋá mimmee,

an nín bàà sá bilee ń nyēe, ikuŋkum ń nyā,

an nín bàà sá ɔɔji ń nyēē, ukeenja ń nyā.

Yoob nyɔɔbunjoolkaaŋi dee.