Yoob 33

Unimbɔti kpáafí unil ní

1 Ama sii Yoob, pīlifì tin m cáá kí sòoǹee,

kpòon̄ a-tafal kí pīlifì m-nyɔɔbuŋŋi.

2 Kpèè, m làá wàan̄ m-nyɔkɔ,

ní anyɔɔbun bɔ́ntì kí nyā.

3 M làá sòoǹ nì si nì dipɔbil diba ní.

M-nyunculiŋ làá tábití kí sòoǹ ibaamɔn ní.

4 Unimbɔti Fam di náań-mi,

Unimbɔti Mpɔŋkɔdaan fooku di yāntì m bí dimaŋfalin.

5 A yaa ŋūǹ, a ŋūǹ kí kíí-mi,

bɔ́ntí a-ba kí kpákáǹ-mi!

6 Unimbɔti nimbiinee, man nì si ŋmà ní,

kuyɔkɔu ní bi dūu máń ma mun.

7 An puee aa máaǹ kí fàŋkì-mi,

àá kí dàkafì yii m làá wɔ́b́-si.

8 M dáá gbíntìi gbìl̀ a-nyɔkɔ pu,

ŋyunti ŋun a bí ki sòoǹ ki bùsī yii:

9 «M bí circir, maa ŋá ikpiti.

M bí deedee kaa yīntì.

10 Ama Unimbɔti gbíntìi kāntí dibɔkpil m-pu,

u dū-mi ki kútì u-nannanliibi pu.

11 U bá m-taaŋi akpambaa,

u-nimbil pée cɔ́ tin kɔkɔ m ŋáańee pu ní.»

12 Ama Yoob, yàntī ḿ tùkù-si yii a yīntì dijandi gbanti pu,

di sá yii Unimbɔti jítiǹ unil kpataaa.

13 Ba pu ní a yíiń-u tibuul?

Úǹ kaa cáá kí tùkù ubɔ tin u ŋáańee.

14 Unimbɔti dì isan tikpil pu ki sòoǹ,

ama unil kaa dūu yíiń tiba.

15 U sòoǹ kí dūú dī kudamintiiu nì dileedakal poon,

ŋyunti ŋun ní kugeembiiu jéetì unil pu

u dɔ̄ u-dooŋu pu ki gèeǹee.

16 U lèekī ki dàkà-bi

ki kpáafí-bi kaa gbèentí,

17 bí bàà fàtī bi-boon kí tīī bi-tuŋkpitiŋ,

kí taa jēetí dilambilin.

18 Míǹ ní u ŋáań ki fìil̄ bi-nammu ki nyāntí ŋkúmin,

u fìil̄-bi ki nyāntí nsan ŋun cáǹ unil ŋkúminee.

19 Ama Unimbɔti dù iween kí dáaĺ unil tafal kí bíĺ-u u-dooŋu pu:

niinee ní nnaanyeem ń yàntī u-wunti jìkì kaa gbèentí,

20 ní tijin kaa ti mɔ̄ u-nyɔkɔn,

ki kpáaǹ tijin tin u néeńee, u-nimbil kaa ti là kí wāl̀-tì.

21 U dúntí ní baa ti wāĺ u-wunnanti,

ní ú kpántí akpab ŋma.

22 U-taal kíǹ ki làkā ntaŋkpiifal pu ní,

ŋkúm tuuŋyi di kíǹ ki yì u-maŋfal.

23 Ama Unimbɔti tuuŋyi kutukub kutukub

bin bí ki tútúǹ binibee ŋubɔbɔ

ŋūǹ kí dàkà-u tin kítèe.

24 Ntuunee làá sɔ̄ u-saai ní kí gbàam̀ Unimbɔti yii:

«Taa yàntī ú dòon̄ u-ŋaliŋu pu,

m ká nsan ŋun pu m làá dī kí fīī-u kí lííyee.»

25 Niinee ní ubunlee ń fàtīí ŋá gbàlgbal kii kibikee,

ní kí fàtīí gítí u-naacimpɔnti yuntiŋu.

26 U yaa mēē Unimbɔtee, u pílifíǹ-u,

u jáaḿ Unimbɔti nì dipɔɔpindi,

di sá yii u fīī-u ki nyántì ŋkúm ŋaan.

27 U gà ilan samaa nimbiin ki lì yii:

«M nìn ŋá ikpiti, m nìn yīntì mara,

ama Unimbɔti kaa dáaĺ m-tafal kii an nín bàà máaǹ puee.

28 U fīī m-naŋki ki nyántì ŋkúm ŋaan,

m làá nīn bí kí fàtīí ká ŋwalifi.»

29 Unimbɔti ŋáań tin bí nee kɔkɔ,

ŋfunyɔm mili, mita ki tìì unil,

30 kí ŋmā kí fīī udaan maŋfal kí nyāntí ditaŋkpiilin,

ní kí yàntī binifoobi walifiŋu ń ŋmíntí u-pu.

31 Yoob, a máaǹ kí pīlifiǹ-mi tiŋan,

á ŋmīĺ fɔ́ŋfɔŋ kí yàntī ḿ sòoǹ.

32 A yaa cáá tiba kí sòoǹaaa, á sòoǹ,

di sá yii án làá nīn sá-mi mmɔŋkpaan ḿ tīī-si mmɔ́ɔn.

33 A yaa kaa ti cáá tiba kí sòoǹaaa, á pīlifiǹ-mi,

á ŋmīĺ ḿ dàkà-si iciin.