Yoob 34

Eeliiwuu bíi kɔ́kɔĺ Yoob

1 Niinee ní Eeliiwuu nìkī ki lī yii:

2 Nimbi bin sá biciŋfitiibee, pīlifìmaan tin m cáá kí sòoǹee,

nimbi binyiliibee, pīlifimaan-mi.

3 Ditafal tundi di sá dí nīn pílifí tibɔti,

a lì kii dilimbil mun nín dákafí tijin kí béé ti-mɔŋŋu puee^a.

4 Míǹ puee tí nyàab̀ kí béé tin bí deedeeyee,

dicilpuee, tí nyàab̀ kí béé tin ŋān̄ee!

5 Yoob bí ki lì yii: «M sá deedeedaan,

ama Unimbɔti kaa là kí pɔ̀-mi.

6 Min kamaa m sá deedeedaanee, m kpántì kii unyimɔndaanee.

U yá-mi mpiin ki tīī-mi tiweendi, min kamaa maa ŋá ikpitee.»

7 Ni gíti ká ubɔ u bí kii Yoobeeee?

U sìí Unimbɔti sɔkɔmii kii bi nín nyù nnyim puee ní!

8 U nì bikpitiŋaliibi di tāatí,

u nì binikpitib di cáá mpèé.

9 Di sá u lī yii: «Ba ní an kútí unil

ú nyàab̀ kí nīn fáatiǹ Unimbɔti ní?»

10 Nimbi bin gbìl̀ tibɔti taapuee, pīlifìmaan-mi!

Unimbɔti kaa ŋūǹ kí ŋá tikpitil dalba dalba,

Yilpu fɔ́ŋŋŋ Nimbɔtiu kaa ŋūǹ kí ŋá tin kaa bí deedeeyee!

11 Ama u pà binib bi-tuuŋŋi paati ní,

báà ŋma bimbim nín máaǹ kuŋyee ní u fòol̄^b.

12 Ibaamɔn poonee, Unimbɔti kaa ŋáań tikpitil,

Unimbɔti Mpɔŋkɔdaan kaa pɔ̀ gandi!

13 Ubɔ di dū kitiŋ ki kpāaǹ Unimbɔtaaa?

Ama úǹ baba di cáá duulinya kɔkɔ pu mpɔn.

14 Unimbɔti yaa bàà dàkafī úǹ baba pu,

ní ki fàtīi fòol̄ u-fooku kun tìì dimaŋfalee,

15 binifoobi kɔkɔ bàà pée kúù dicilpu ní,

ní binib ń fàtīí kpántí ntam.

16 Yoob, a nín cáá dinyilee, pīlifì tin bí nee,

kpòon̄ a-tafal kí pīlifì tin m làá sòoǹee.

17 Unimbɔti yaa bàà ná tin bí deedeeyee,

u bàà ŋūǹ kí jī dibeelaaa?

A là kí kpɔ̀ un baba bí deedee ki cáá mpɔnee bɔtaaa?

18 Úǹ baba di ŋūǹ kí tùkù ubɔti yii: «Aa bí tiban!»

ní kí tùkù abɔtibil yii: «Ni sá binikpitib.»

19 Úǹ baba di sá un kaa yūlifí bibɔtiibi boonee,

waa sòoǹ kí pɔ̀ ugaaja kí kpɔ̀ usoodaan bɔti,

di sá yii úǹ di náań bi-kɔkɔ.

20 Ni dāa kā kunyataasiiu tantaasee, bi kpíì.

Samaa yíkí kaa kíikí bi-ba pu ní bí cúú bikpootiliibi kí kpɔ̀.

Bi pée cútí upɔndaan ní kí kpɔ̀ sɔkɔmii.

21 Unimbɔti nimbil cɔ́ unil bimbim pu

ní ki kpèé u-saŋkindi kɔkɔ.

22 Dibɔmbɔndi diba kaa bí ki bɔ̀ǹ

kí ŋmā kí pìin̄-u nsan ú taa wāl̀ bikpitiŋaliibi.

23 An kaa bàlifī Unimbɔti ń yíiń ubɔ tibuul

ní udaan ń nín cù ú sòoǹ u-bɔti.

24 An kaa bàlifī ú nyàab̀ kí béé ní kí nín nàan̄ abɔtibil,

kí dū biba kí kàan̄ bi-paaŋŋu pu.

25 Di sá yii u nyí bi-tuuŋŋi kɔkɔ,

u kpákatí-bi kunyabaantiiu ní kí nàb̀ dúsi dusi.

26 U fátí-bi kí bíĺ binib nimbiin, kii digaŋgam dambee.

27 Binib gbanti nìn fātì bi-boon ki tīī-u,

baa nìn dū u-dàkatam ki yíiń tiba.

28 Bi yāntì bisoodambi biilii bāań-u,

bi yāntì Unimbɔti gbìl̄ binandambi biilii pu!

29 Báà Unimbɔti yaa lēē kí nīn ŋmí, ŋma làá kpɔ̀ u-bɔti?

U yaa dū u-ba ki bál̀, ŋma làá wāl̀-u?

Ama úǹ di kpèé atimbun nì binib,

30 ki pìintí unikpiti nsan ú taa jī binib pu dibeel,

unil un di mɔ́ntí binibee.

31 Tí dūú ŋmàntī yii ubɔ bí Unimbɔti yii:

«M ŋá ikpiti, ama m pōoǹ yii maa ti làá ŋá ikpiti.

32 Dàkà-mi ikpiti in ní maa ŋúń ki wál̀ee.

M yaa yīntì, maa ti làá ŋá míǹ.»

33 Sii ceeyee, Unimbɔti làá dáaĺ u-tafalaaa?

M nyí an nín kaa ká-see.

An sá sii di lēē, an kaa sá man,

míǹ puee tùkù-mi tin a nyée.

34 Binib bin cáá dinyilee

nì biciŋfitiibi bin pílifiǹ-mee làá lì yii:

35 «Yoob bíi sòoǹ, ama waa nyí tin u sòoǹee,

u-nyɔɔbuŋŋi dàkà yii waa nyí tiba.

36 U sòoǹ kii unikpitee,

see bí gíti nyɔ̀kɔfì u-bɔti nee tiŋan.

37 U ŋá ikpiti ní ki gíti yíkì kaa kíí u-ba pu,

ki bíi jáà nì Unimbɔti kaa gbèentí.

U yāntì ti kɔ́ digugufil poon.»