Ilan 22

Deedeedaan falaau nì u-mákal

1 Daafiidi di ŋmàn̄ nlan nee ki tīī bilaŋgaaliibi kpiliu.

2 M-Nimbɔtiu, m-Nimbɔtiu, ba ŋá ní a dū-mi ki fá^a?

M gbáń ibiil ki tin gīī,

ama difiil dáá gbíntìi dátiǹ-mi.

3 M-Nimbɔtiu, m kúuǹ ki yíiń-si ŋwiimpu,

ama ní aa kíí-mi.

M yíiń-si kunyeeu mun, ama ní kaa ká diŋuŋfil.

4 Too, sii mun di sá circirdaanee,

a kā a-beejal pu ní Isirayeel nyɔ́ŋkí-si.

5 Sii pu ní ti-baabi nìn máká,

bi nìn máká a-pu ní a fìil̄-bi.

6 Bi nìn kūuntí ki yíì-si ní a fìil̄-bi,

bi nìn dù bi-mákal kí páań a-pu ní icoo kaa jīǹ-bi.

7 Ama mamee, m kpántì kii ujiliŋkpaamee ní, maa ti sá nil.

Binib sìí-mi ní báà ŋma kpèé-mi fám.

8 Un yaa pée ká-mee bèel̄-mi ní,

bi dɔ̀tī bi-nyunculiŋ ní ki gbákafí bi-yiliŋ ki lì yii^b:

9 «Kéè u bí yii u máká ti-Dindaan pu naa!

Too, ti-Dindaan ń fīī-u tí kpèè.

Ti-Dindaan yaa néeń-uee, ú jòoń-u tí kpèè^c!»

10 Sii di nyántìń-mi m-na poon,

ní ki lōō-mi m-na taaŋi pu.

11 Bi nín pée màl̄-mee, sii ŋaan ní m bí.

Kí wàatī bí màal̀-mi muee,

sii di nìn pée sá m-Nimbɔtiu.

12 Nín̄ bí ki kɔ́ĺ-mi,

di sá dinimbinaamandi kaa dátiǹ-mi,

ní ubɔ mun kpá kí jòoń-mi.

13 M-nannanliibi tikpil māntìi gɔ́ń-mi kii inajaayee,

Baasan tiŋki najakpaaŋyi māntìi tú-mi.

14 Bi wāaǹ bi-nyɔmmu bàaa m-pu,

a lì kii gbikintib di cúú tinan ki làá tɔ̀ntēe.

15 M kpántì kii nnyimee ní ki pùub̀,

m-taaŋi kpíì maa ti ŋūǹ kí sīĺ,

m-pɔbil dūntì m-poon kii nsikampimuee.

16 M-neen kūń kii dikàlee,

ní m-limbil dūu nákáǹ m-neen.

A dū-mi ki síiǹ nnyiŋkúm saŋŋu pu.

17 M-nannanliibi bin bí kii ibooyee māntìi gɔ́ń-mi,

digaŋgam dambi dikitimɔndi māntìi tú-mi,

bi sāā ki cíl̀ m-ŋalii nì m-taaŋi.

18 M dúntì ki kíǹ akpab ŋma,

ní m-nannanliibi kpèé-mi cìii.

19 Bi dū m-wampeeŋkaati ki yākatì,

ní ki tɔ́ m-bɔkutifɔkɔl pu kasi^d.

20 Ama sii m-Dindaan, á taa nín̄ dátiǹ-mi,

sii un tìì-mi mpɔnee, dāan̄ malaa kí jòoń-mi.

21 Taa yàntī m-nannanliibi ń dū bi-tàataajimmu kí kpɔ̀-mi.

Fīī-mi kí nyāntí iboo nee ŋaan.

22 Fīī-mi kí nyāntí gbikinti nyɔmmun,

kí nyāntí-mi upɔɔnaa yiŋyin.

A fōō m-wimmeem.

23 M làá sòoǹ a-yindi pu kí tùkù m-nabiyaamu,

m làá nyɔ̄ŋkì-si samaa kansikin^e.

24 Nimbi bin tɔ́ ti-Dindaan ki jáaḿ-uee, ní nyɔ̄ŋkì-u!

Nimbi Jaakɔb naantiibi kɔkɔ, ní tīī-u tinyool!

Nimbi Isirayeel yab kɔkɔ, ní fàŋkì-u.

25 Di sá yii waa dū unandaan ki fá u-nandaŋku poon,

kaa tí fātì u-kpaŋkpamboon ki tīī-u,

ama unandaan yaa kúuǹ ki yíiń-uee,

u pílifíǹ-u ní.

26 Samaa kɔkɔ kansikinee, m làá nyɔ̄ŋkì-si

kun ní a ŋée pu.

Bin tɔ́-si ki jáaḿ-see nimbiin

ní m làá ŋá saraabi bin m nìn pōoǹ yii

m làá ŋá kí tīī-see.

27 Unandaan làá jī ní kí díkí,

bin nyàab̀ ti-Dindaanee làá nyɔ̄ŋkì-u.

Unimbɔti ń tīī-ni mmaŋfafɔkɔn.

28 Atimbun ŋin kɔkɔ bí kitiŋ puee

làá téetí ti-Dindaan pu ní kí fàtīí gítiń u-cee,

ní anibul kɔkɔwoooo nib

ń dāá gbàan̄ u-nimbiin kí jāam̀-u.

29 Di sá yii ti-Dindaan di yì dibeel,

ní ki jīǹ atimbun kɔkɔ pu dibeel.

30 Kitiŋ pu gaajab làá jī kí díkí ní kí gbàan̄ u-nimbiin.

Bin taaŋi jòon̄ ŋfal puee kɔkɔ làá gbàan̄ u-nimbiin,

ki kpáaǹ un mun kaa ti làá ŋmátée.

31 Bi-naantiibi làá dāá jāam̀-u,

bi làá dāá sòoǹ ti-Dindaan pu

kí tùkù bin dáá bíń ki dòońee.

32 Bi làá dāá māafì bin baa láá màl̄ee

tin ti-Dindaan ŋá ki fīī u-nibee.