Oo m-Nimbɔtiu, sii pu ní m máká
25
1 Daafiidi di ŋmàn̄ nlan nee.M-Dindaan, m fātì m-ba ki túĺ-si.
2 M-Nimbɔtiu, sii pu ní m máká, taa yàntī icoo ń cúú-mi,
kí taa yàntī m-nannanliibi ń já kí pɔ̄ɔkiǹ-mi.
3 Á taa pée yàntī icoo ń cúú
bin dū bi-mákal ki páaǹ a-puee.
Ama icoo ń jī bin jáà nì see, bí gbíntí nì iŋaŋkulim.
4 M-Dindaan, yàntī ḿ béé a-saŋŋu,
dàkà-mi min a là ḿ nīn bée.
5 Kpòotī-mi a-baamɔŋyi poon kí dàkà-mi.
Di sá yii sii di sá Unimbɔti un fìil̄-mee,
sii pu ní m máká baabadal.
6 Ti-Dindaan, téetí yii doooo cannaaku
ní a sá Unimbɔti un poon mɔ̄ ki cáá dineeŋkpaandee.
7 Taa ti téetí m-yìntitam nì m-kpitii
in m ŋá m-naacimpɔntinee pu.
A-neeŋkpaandi nì a-ŋanti puee,
á téetí m-pu, m-Dindaan.
8 Ti-Dindaan ŋān̄ ní ki bí deedee,
an pu ní u dàkà ukpitiŋal nsan ŋun u máaǹ kí dēe.
9 U kpòotī bin sīntiǹ bi-ba taapuee
bí nīn ŋáań tin bí deedeeyee,
ní ki dàkà-bi u-saŋŋu.
10 Tin kɔkɔ ti-Dindaan ŋáańee
sá dineendi nì ibaamɔn ŋma ní
ki tīī bin ŋúb́ u-poondi ki tɔ́ u-marabee.
11 Ti-Dindaan, a-yindi puee, dū m-kpitii kí pɔ̄-mi,
di sá yii i wīikí tikpil.
12 Unil yaa bí ní ki fàŋkí ti-Dindaanee,
ti-Dindaan dàkà-u nsan ŋun u máaǹ kí nóóyee ní.
13 An niliuee làá nīn bí mmɔnni,
ní u-nibooliŋu ń dāá fōō kitiŋ kí nīn kíǹ ki yìa.
14 Bin fàŋkí ti-Dindaanee sá u-bɔɔbi ní,
ní u yàntī bi béetí u-poondi.
15 M-nimbikpeeŋu pée cɔ́ ti-Dindaan pu ní,
di sá yii úǹ di nyāntí m-taaŋi kulaaŋŋu kun nìn sàl̄-mee poon.
16 Fàtī a-nimbiin kí túĺ-mi kí sɔ̄ m-saai, m-Dindaan,
kun puee m bí m-baba ki gbí falaa.
17 Kunimbaau gbí m-pɔbilin,
nyāntí-mi m-gìŋ́ŋi poon.
18 Kpèè m-falaau nì m-nimbinaamandi,
ní kí dū m-kpitii kɔkɔ kí pɔ̄-mi.
19 Kpèè m-nannanliibi nín wīikí puee,
bi ná-mi ní an kaa cáá bí lì.
20 Nín̄ wúń m-pu kí fīī-mi.
Taa yàntī icoo ń jī-mi,
di sá yii sii ní m sáǹ ki kɔ́.
21 Tibulcin nì tin bí deedeeyee ń fīī-mi,
kun puee m máká a-pu ní.
22 Unimbɔti, dā a-nib Isirayeel yab kí líí!
Fīī-bi kí nyāntí bi-gìŋ́ŋi kɔkɔ poon.