Ilan 26

Maanyiibadaan bíi kūuntí ki yíì Unimbɔti

1 Daafiidi di ŋmàn̄ nlan nee.

M-Dindaan, sòoǹ kí pɔ̀-mi,

di sá yii m ŋáań tin bí deedeeyee,

ní m máká sii m-Dindaan pu kaa gùgufī.

2 Cɔ̄ŋkì-mi, m-Dindaan, cɔ̄ŋkì-mi.

Cɔ̄ŋkì m-landɔkɔi nì m-pɔbil.

3 Di sá yii maa pée súntí a-neeŋkpaandi din a cáá m-puee pu,

a-baamɔŋyi di kpòotī-mi.

4 Man nì binyimɔndambi kaa kpáfí ki kàal̀,

man nì mpoonnyoon dambi kaa cáá nnyɔɔpee.

5 Maa là kí wāl̀ digaŋgam dambi kitil,

ní kaa kàal̀ binikpitib cee.

6 M-Dindaan, m fíntí m-ŋalii kí dàkà yii m sá maanyiiba,

ki còom̄ ki màntī nsaraafan,

7 ki gà ilan ki jáaḿ-si,

ní ki sòoǹ atuŋkpaan ŋin kɔkɔ a ŋée pu.

8 M-Dindaan, m néeń kí nīn bí a-diikun,

laakin a lèekī a-nyooti ki dàkèe.

9 Á taa nàan̄-mi kii a nín làá nàan̄ binikpitib puee,

kí taa kpɔ̀-mi kii a nín làá kpɔ̀ binikpɔliibi puee.

10 Bi bɔ́ntì kí tɔ̄ atuŋkpiti,

ní tiwan tin bi làá dūú ŋéeb́ binib nyɔmmuee gbí bi-ŋaan.

11 Ama mamee, baa kāntí tikpitil tiba m-pu.

Sɔ̄ m-saai ní kí fīī-mi.

12 M còom̄ nsan ŋun cáá dimákalee pu.

Laakin samaa yaa kpáfèe, niin ní m làá nyɔ̄ŋkì ti-Dindaan.