Ilan 27

M yaa bí ti-Dindaan ceeyee, maa fàŋkí tiba

1 Daafiidi di ŋmàn̄ nlan nee.

Ti-Dindaan di sá m-walifiŋu nì m-fiiliu,

kin ŋma ní m làá gíti fàŋkì?

Ti-Dindaan di wúń m-pu,

kin ŋma di ŋūǹ kí fàaǹ-mi?

2 Binikpitib yaa lúuń-mi kí cúú-mi kí tɔ̀ntēe,

bíǹ m-nannanliibi nì bin kaa là kí wāl̀-mi gbantee

di làá gbéetí ní kí lítí.

3 Dijanjakitil yaa māntìi tú-mi,

m-pɔbil kpá kí bīil̀.

Báà m-nannanliibi yaa bíi jáà nì mi,

m làá nīn gbíntìi máká ti-Dindaan pu.

4 Kuwambambaantiiu ní m mēē ti-Dindaan,

ní kuwambambaantiiu gbanti ní m pée là:

ḿ nīn kóò ti-Dindaan diikun m-maŋfal wiiŋyi kɔkɔ poon,

kí ŋmā kí nīn pée kpèé ti-Dindaan nyaaŋku,

ní kí nyàab̀ kí béé-u u-kɔŋkooŋŋun.

5 Dinimbinaamandi wiiŋŋuee,

u làá dū-mi kí báĺ u-balilaŋkin.

U làá dū-mi kí báĺ u-tantiu poon poon,

ní kí dū-mi kí tɔ́kɔń ditaŋkpafɔkɔl pu yilpu yilpu.

6 Niin ní m làá nīn kpèé m-nannanliibi

bin māntìi tú-mee m-yil gáań.

M làá fáá ŋwiliili kí ŋá saraabi u-tantiun,

ní kí gāā ilan in mɔ̄ee kí nyɔ̄ŋkì ti-Dindaan.

7 Ti-Dindaan, m yaa kūuntí ki yíì-see,

á sɔ̄ m-saai kí kíí-mi.

8 M dàkafī a nín lī puee yii: «Nyàab̀maan-mi!»

Too m-Dindaan, m nyàab̀-si.

9 Taa fàtī a-boon kí tīī-mi!

Taa gbāfì man a-tɔntɔnliu nì diŋuul.

Sii di sá m-jòońliu,

taa yàntī-mi, taa dū-mi kí fá,

Unimbɔti, m-fiiliu.

10 Báà m-baa nì m-na yaa dū-mi ki fá,

sii m-Dindaan làá fōō-mi^a.

11 M-Dindaan, dàkà-mi a-saŋŋu.

M-nannanliibi puee,

kpòotī-mi kí tàkan̄ nsammɔnti pu.

12 Taa dū-mi kí líiǹ m-nannanliibi,

di sá yii nnyimɔn seeradambi

yíkìi jáà nì mi ki sòoǹ nì tininjati.

13 M cáá dimákal yii m làá nīn bí kí ká

ti-Dindaan ŋanti binifoobi tiŋkin.

14 - Nín̄ máká ti-Dindaan pu.

Pɔ́ɔǹ a-ba kí ká dipɔbil.

Nín̄ máká ti-Dindaan pu.