Ilan 28

Unil un wál̀ ŋkúmee wimmeem

1 Daafiidi di ŋmàn̄ nlan nee.

Sii m-Dindaan ní m kūuntí ki yíì.

M-taŋkpanaakooku, taa kpáá a-tafaliŋ!

Di sá yii a yaa ŋmí kaa kíí-mee,

m làá nīn náań nì un sìntī ditaŋkpiilinee dee.

2 Á pīlifì m-gbaamii

ŋyunti ŋun m yaa bíi kūuntí ki yíì-si,

ki yòontí m-ŋalii yilpu

ki túl̀ circir kɔŋkooŋŋu watil púee^a.

3 Taa nàan̄-mi kii a nín làá nàan̄ binikpitib,

àá bikpitiŋaliibi puee.

Bi sòoǹ nì bi-jutiibi kinyɔɔmɔɔi,

ama ní ikpiti gbí bi-pɔbiliŋ poon.

4 Dáaĺ bi-tafal kí nóó nì tin bi ŋée,

kí nóó nì bi-tuŋkpitiŋ.

Dáaĺ bi-tafal bi-tuuŋŋi pu,

pà-bi tipaal tin máaǹ-bee^b.

5 Di sá yii baa fātìi tɔ́ ti-Dindaan tuuŋŋi,

atuun ŋin u dū u-ŋalii ki túńee.

An puee ti-Dindaan ń nàan̄-bi

kí taa ti yàntī bí yīkì.

6 Bí nyɔ̄ŋkì ti-Dindaan,

di sá yii u pílifì m-gbaamii.

7 Ti-Dindaan di sá m-balilaŋki nì m-gbampɔɔl.

M dū m-mákal ki páaǹ u-pu,

ní u tútuǹ-mi ní m bí dipɔɔpindin.

M làá gāā ilan kí nyɔ̄ŋkì-u.

8 Ti-Dindaan di sá u-nibul pɔŋŋu,

úǹ di wúǹ ubɔti un u lēēyee pu ní ki fìil̄-u.

9 Ti-Dindaan, fīī a-nib kí bìin̄ a-nibooliŋu boon.

Nín̄ sá un kpàá-bee kí nīn kpèé-bi baabadal.