Ilan 29

Ti-Dindaan sòon̄ ditaadundin

1 Daafiidi di ŋmàn̄ nlan nee.

Nimbi ituun, ní nyɔ̄ŋkìmaan ti-Dindaan,

sòom̀maan u-nyooti nì u-pɔŋŋu pu.

2 Nyɔ̄ŋkìmaan ti-Dindaan kí tīī u-yindi tinyool.

Ní bòom̄maan ti-Dindaan nimbiin

ŋyunti ŋun u yaa lēē u nín bí circir puee ki dàkēe.

3 Bi gbìl̀ ti-Dindaan neen pu inyiŋfi pu.

Unimbɔti tinyooldaan sòoǹ kii ditaadundee ní,

ti-Dindaan cáá inyiŋfikpaan pu mpɔn.

4 Ti-Dindaan yaa sòoǹee, u dàkà u-pɔŋŋu ní,

ti-Dindaan yaa sòoǹee, u dàkà u-kpaanti ní.

5 Ti-Dindaan yaa sòoǹee, seedir sufii kɔ́fí ní,

ti-Dindaan kɔ́fí Leebanɔn seedir sufii.

6 U yàntī Leebanɔn jool yùkufī kii dinajapɔmbilee,

ní Eermɔn jool yùkufī kii kupɔɔun najapɔmbilee.

7 Ti-Dindaan sòoǹ ní aŋmilimbil nyēē.

8 Ti-Dindaan yaa sòoǹee, kuteeu cìŋkī ní,

ti-Dindaan yàntī Kadeesi teeku cìŋkī.

9 Ti-Dindaan yaa sòoǹee,

seeni sufii cìŋkī ní^a,

ní kubambaŋŋun sufii faati gbátí.

Báà ŋma lì ti-Dindaan diikun yii:

«Bí nyɔ̄ŋkì Unimbɔti.»

10 Nnyiŋgbeen yuntiŋuee, ti-Dindaan nìn pée kā dibeel ní,

ti-Dindaan sá ubɔti ní kí nīn cá jaanjaan.

11 Ti-Dindaan làá tīī u-nibul mpɔn,

u làá bìin̄ u-nibul pu bí nīn bí ŋgbansɔŋfin.