Ilan 30

Ti-Dindaan, a tīī-mi dimaŋfal

1 Daafiidi di ŋmàn̄ nlan nee. Bi gāā-ŋu ki dū kunimbɔtidii ki sú Unimbɔti ní.

2 M-Dindaan, m làá nyɔ̄ŋkì-si, di sá yii a fīī-mi,

ní kaa yāntì m-nannanliibi ŋúb́-mi ki bèel̄ ki lāā.

3 Ti-Dindaan m-Nimbɔtiu,

m fáá mbiil á jòoń-mi ní a cáaǹ-mi.

4 M-Dindaan, a nyántìń m-naŋki ditaŋkpiilin.

M bàà sìntī dikaakulin,

ama ní a fātìi tīī-mi dimaŋfal.

5 Nimbi bin kɔkɔ sá ti-Dindaan nibee,

ní gāāmaan ilan kí nyɔ̄ŋkì-u.

Ní jāam̀maan-u kí lì yii u sá circirdaan.

6 Ti-Dindaan ŋuul kaa súŋkí unil pu,

ama u-ŋanti tíǹ pée bí u-pu ní

kí tin sāā u-kúm dal.

Kujoouee, an sá nsiim,

ama kutaafaauee ní an sá mmɔn.

7 Ŋyunti ŋun m nìn bí tiba kaa páb́-mee,

m nìn lì yii: «Tiba pée kpá kí ŋá-mi.»

8 A-ŋanti puee, m-Dindaan,

a nìn wúń m-pu kii dijookpaandee.

Ama a dāa fātì a-boon ki tīī-mee, ní dinyoondi kɔ́-mi.

9 Ti-Dindaan, sii ní m kúuǹ ki yíiń,

m gbāam̀ sii m-Dindaan ní.

10 M yaa kpíìyaaa, m yaa nín sìntī ditaŋkpiilinaaa,

ba ní a làá páatí?

Bin kpíì ki kpántì ntamee gíti ŋūǹ kí nyɔ̄ŋkì-saaa?

Bi gíti ŋūǹ kí sòoǹ a-deedeeu puɔɔɔ?

11 Pīlifì m-Dindaan, sɔ̄ m-saai,

jòoń-mi, m-Dindaan!»

12 A yāntì m-kpisilaŋyi kpántì ifaal ŋool.

A lēē kutukub bin m pēēyee,

ki dū dijiŋaabɔkutil ki pēeǹ-mi.

13 An pu ní m làá nìn gà ilan ki nyɔ́ŋkí-si kí taa gbèen̄.

M-Dindaan m-Nimbɔtiu, m làá nīn pée jáaḿ-si ní baabadal.