M-Dindaan, sii ní m sáǹ ki kɔ́
31
1 Daafiidi di ŋmàn̄ nlan nee ki tīī bilaŋgaaliibi kpiliu.2 M-Dindaan, sii ní m sáǹ ki kɔ́,
taa yàntī icoo ń jī-mi dalba dalba!
A nín sá deedeedaan puee, fīī-mi.
3 Kpòon̄ a-tafal m-watil pú!
Dāá fīī-mi malaa.
Nín̄ sá m-taŋkpanaakooku,
kibalilaŋ kin fìil̄-mee.
4 Sii di sá m-taŋkpanaakooku nì m-balilaŋki.
A-yindi puee, nín̄ dàkà-mi nsan kí nīn kpòotī-mi.
5 Nyāntí-mi kulaaŋŋu kun bi píĺ-mee poon,
di sá yii sii di sá m-balilaŋki.
6 M dū m-ba ki ŋá a-ŋaan nía,
fīī-mi ti-Dindaan, ibaamɔn Nimbɔtiu.
7 M ná bin tòotī awaa ŋin kaa bí tibanee.
Mamee, ti-Dindaan pu ní m máká.
8 M làá nīn fàal̀ ní kí nīn bí mmɔnni a-ŋanti pu,
di sá yii a ká m-falaau
ní ki béè dinimbinaamandi din poon m bée.
9 Aa dū-mi ki ŋá unannanli ŋaan.
A yōoǹ-mi ki síiǹ m-taaŋi pu ní ki yāntì m tɔ́ m-ba.
10 Sɔ̄ m-saai, ti-Dindaan,
di sá yii m bí dinimbinaamandin.
Kunimbaau ŋmɔ́ ki bíil̀ m-nimbiliŋ
nì m-naŋki nì m-wunti kɔkɔ.
11 M-maŋfal wiiŋyi làá kúntí kunimbaau poon ní,
abin ŋin kíǹ-mee làá kúntí diniindi digbál poon ní.
M-kpitii puee, maa ti cáá mpɔn,
an ŋmɔ́ ki bíil̀ m-kpabiŋ.
12 M-nannanliibi sìí-mi,
ní m-kɔŋkɔnaatɔb kìntī.
Bin nyí-mee fàŋkí-mi.
Bi yaa wál̀-mi m páaǹnée bi sáń-mi ní.
13 Bi súntí m-pu kii unil un kpíìyee ní,
m kpántì kii tiwan tin bi dūu fée ní.
14 M gbìl̀ tibɔkpitil tin binib sòoǹ m-puee,
dinyoondi māntìi tú-mi an kɔkɔ pub.
Bi kpáfì kinyɔkɔ m-pu,
bi bɔ́ntì kí lēē m-maŋfal.
15 Ama mamee, m máká sii ti-Dindaan pu ní.
M lī yii: «Sii di sá m-Nimbɔtiu.»
16 M-maŋfal wiiŋyi kɔkɔ bí a-ŋaan.
Fīī-mi m-nannanliibi nì bin kā m-puee ŋaan.
17 Dàkà man a-tɔntɔnliu a-laŋŋaŋfitiiku.
A-neeŋkpaandi puee, fīī-mi.
18 Ti-Dindaan, m yaa bíi kūuntí ki yíì-see,
á taa yàntī icoo ń jī-mi!
Ama á yàntī icoo ń cúú binikpitib,
bí nīn ŋmí fɔ́ŋfɔŋ díkí diki ki sìntī ditaŋkpiilin.
19 Yàntī binyimɔndambi gbanti ń kpántí bimɔɔmiimbi,
bíǹ bilambidambi bin yòontí bi-ba yilpu,
ki sòoǹ ki bíiĺ deedeedaanee.
20 Tiŋan tin a bɔ́ntì ki síiǹ bin fàŋkí-see wīikéeee!
A ŋáań bin sáń ki kóò-see tiŋan gbanti binib kɔkɔ nimbiin ní.
21 A cáá-bi ki bāal̀ laakin ní sii a-ba bée
bí nīn dátiǹ tin binib bíi bɔ́ntí bi-puee.
A cáá-bi ki bāal̀ a-balilaŋki
bí nín dátiǹ binib siibiliŋ.
22 Tí nyɔ̄ŋkìmaan ti-Dindaan!
Di sá yii u dàkā-mi u-neeŋkpaandi
ŋyunti ŋun ní m-nannanliibi nìn māntìi tú-mi
kii bijanjaliibi nín màntī kí tū kitiŋ kí já nì kì puee.
23 M-pɔbil nìn bíil̀ ní m lī yii:
«A fātì a-boon ki tīī-mi dee!»
Ama a gbìl̄ m-gbaamii pu
ŋyunti ŋun m fáá mbiil ki yíiń-see.
24 Nín̄ néeḿmaan ti-Dindaan, nimbi bin sá u-yabee.
Ti-Dindaan mɔ́tí bin fōō-u ki kííyee pu,
ama ní ki dátí ulambidaan tafal min máaǹee.
25 Ní pɔ́ɔm̀maan ni-ba kí ká dipɔbil,
nimbi bin kɔkɔ máká ti-Dindaan puee.