Ilan 32

Unil un ká u-kpitii pɔ̄tamee bí mmɔnneeee!

1 Daafiidi di ŋmàn̄ nlan nee.

Unil un Unimbɔti dū u-yìntitam ki pú-u,

ní ki pítì u-kpitiiyee bí mmɔnneeee!

2 Unil un Unimbɔti kaa ti lì yii u ŋá ikpiti,

ní udaan kaa cáá mili mili pɔbilee bí mmɔnneeee^a!

3 M nín nìn ŋmí kaa bīitì m-kpitii puee,

m nìn sūǹ ní baabadal ní an ŋmɔ́ ki bíil̀ m-kpabiŋ.

4 Di sá yii ŋwiimpu nì kunyeeuee,

a-ŋal nìn nyīī m-pu ki dátí m-tafal,

ní m kūń kii dipeel pu wiiŋŋu nín gbáà busubu pu

bu-kpiimi ń fóotí puee.

5 Niinee ní m bīitì m-kpitii pu ki tùkū-si,

maa bál̀-si m-yìntitam.

M lī m-ban yii: «M làá bìitī m-kpitii pu kí tùkù m-Dindaan»,

ní a cúú m-kpitii nyiŋfiŋu ki nyīkitì m-pu.

6 An pu ní deedeedaan kamaa máaǹ kí mèè-si

agìń yuntiŋu poon.

Báà dinimbinaamandi yaa yíkì u-pu kii nnyiŋgbeenee,

an kaa làá ŋá-u tiba.

7 Sii di sá m-balilaŋki,

sii di mɔ́tí m-pu agìń yuntiŋu poon.

A yāntì binib bin māntìi tú-mee gà ifaal laŋyi a nín fīī-mee pu.

8 M làá tīī-si dinyil ní kí dàkà-si nsan ŋun a máaǹ kí dēe.

M làá sāŋkì-si, ní m-nimbiliŋ ń nīn bá a-pu.

9 Taa nín̄ sá ugbaan kii utaamu àá umamboonee.

Tiwaŋkuti gbantee, tikúti nì ŋŋmii

ní bi dūú kpàl̄ ti-nyɔmmu kí ŋmā kí kpòotī-tì.

10 Unikpiti làá jī falaa tikpil,

ama ti-Dindaan ŋanti māntìi tú un máká u-puee ní.

11 Nimbi deedeedambee, an nīn mɔ̄ǹ-ni,

ní nīn fàal̀ ti-Dindaan pu.

Nimbi bin pɔbil bí diba nì Unimbɔtee,

ní fáá ŋwiliili kí nīn fàal̀.