Tí nyɔ̄ŋkì Unimbɔti un náań-tee
33
1 Deedeedambi, nín̄ fàal̀maan ti-Dindaan pu.
An máaǹ bin pɔbil bí diba nì Unimbɔtee ń nyɔ̄ŋkì-u.
2 Bɔ̀ɔ̀maan kubeeu kí jāam̀ ti-Dindaan,
bɔ̀ɔ̀maan iŋmii saalaa beeku kí nyɔ̄ŋkì-u.
3 Gāāmaan nlampɔɔn kí nyɔ̄ŋkì-u,
bɔ̀ɔ̀maan tibɔɔkaal mmɔntiimin kí fáá ŋwiliili.
 
4 Di sá yii ti-Dindaan bɔti tèen̄ ní,
bi ŋūǹ kí nīn máká u-tuuŋŋi kɔkɔ pu.
5 U néeń tin sá deedee nì mbaamɔnee.
Ti-Dindaan ŋanti gbí kitiŋ kɔkɔ.
6 Ti-Dindaan nyɔɔbundi ní u dūu náań kutagbɔŋu,
ní ki sòon̄ ní tin kɔkɔ bí ku-puee nyáń.
7 U kóoǹ amɔɔ nyim ki kpáfì dibɔɔbaantiil,
ní ki cúú tiŋku nyiŋkpaammi ki kpáafì.
8 Kitiŋ kɔkɔ nib ń fàŋkì ti-Dindaan,
duulinya nib kɔkɔ ń nīn tɔ́-u.
9 Úǹ di sòon̄ ní an ŋá u nín lī puee,
úǹ di tīī mara ní tiwan kɔkɔ nyáń.
 
10 Ti-Dindaan yāntì tin atimbun nib bàà bɔ́ntì kí ŋée ŋá fám.
U kpītì tin bi bàà dākafì kí ŋée.
11 Tin ti-Dindaan bɔ́ntì kí ŋée bí ní kí nīn cá jaanjaan,
ní tin u dākafì kí ŋée bí kí nīn cá abin abin.
12 Ditimbundi din Nimbɔtiu sá ti-Dindaanee bí mmɔnneeee!
Dinibul din u lēē dí nīn sá u-gaajawantee bí mmɔnni!
 
13 Ti-Dindaan bíń doooo yilpu
ní ki kpèé ki wāĺ binib kɔkɔ.
14 U kāń u-beejal pu ní u-nimbil làaǹ
bin kɔkɔ bí kitiŋ puee pu.
15 Úǹ di náań bi-kɔkɔ pɔbil,
u nyí tin bi ŋáańee kɔkɔ.
 
16 An kaa sá ubɔti janjaliibi nín pɔ̄ɔ̄yee pu ní u kāntí dijajil,
kaa tí sá ubaatandaan kpabil pu ní u jáà ki pɔ́ɔkíǹ u-nannanliu.
17 Kujaau taamui kaa tìì dijajil,
i-pɔŋkpaaŋŋu kaa fìil̄.
18 Ama ti-Dindaan nimbil bá bin fàŋkí-uee,
nì bin máká u-neeŋkpaandee pu.
19 U fìil̄-bi ŋkúm ŋaan
ní ki kpīintí-bi ŋkùm yuntiŋu.
20 Timbee, ti máká ti-Dindaan pu ní.
Úǹ di tútúǹ-ti ní ki sá-ti digbampɔɔl.
21 Úǹ di yì-tì ní ti cáá dipɔɔpindi,
ní ti máká u-circir yindi pu.
22 Ti-Dindaan, yàntī a-neeŋkpaandi ń nīn bí ti-pu
kii timbi nín máká a-pu puee.