Ti-Dindaan puee maa ti fàŋkí tiba
34
1 Ŋyunti ŋun Daafiidi ŋá kii u sá ugbaan ubɔti Abimeeleeki nimbiina úǹ jìn̄-u ki nyántì u búntèe ní u ŋmàn̄ nlan nee.2 M làá nyɔ̄ŋkì ti-Dindaan ŋyunti kamaa,
u-nyɔŋkii làá nīn pée kā m-nyɔkɔn ní.
3 Ti-Dindaan pu ní m làá nīn fàal̀.
Bin sīntiǹ bi-ba taapuee ń pīlifì kí nīn fàal̀.
4 Kūtìmaan m-pu tí lì yii u sá ukpaan.
Càmaan dicilpuee tí yòon̄ u-yindi yilpu.
5 M mēē ti-Dindaan ní u kíí-mi,
u fīī-mi ki nyántì tin m fàŋkée kɔkɔ poon.
6 Bin kpèé u-watil púee bí dipɔɔpindin,
icoo pée gíti kpá kí jī-bi.
7 Unandaan fáá mbiil ní ti-Dindaan gbìl̄,
ní ki fīī-u ki nyántì u-gìŋ́ŋi kɔkɔ poon.
8 Ti-Dindaan tuuŋyi māntìi tú bin fàŋkí-uee,
ní ki fìil̄-bi.
9 Ní dáań kí kpèè ti-Dindaan nín ŋān̄ pueeb.
Un sáǹ ki kɔ́-uee bí mmɔnneeee!
10 Ní fàŋkìmaan ti-Dindaan, nimbi bin sá u-yabee,
di sá yii tiba kaa lóotí bin fàŋkí-uee.
11 Tijin ŋūǹ kí lóó digbikintipɔmbil ŋkùm ń cúú-dì,
ama tiba kaa lóotí bin nyàab̀ ti-Dindaanee.
12 M-biyaamu, dāam̄maan kí pīlifì-mi,
m làá dàkà-ni ní nīn fàŋkí ti-Dindaan.
13 A là kí nīn bí dimaŋfalinaaa?
A là mmaŋfafɔkɔn kí nīn bí mmɔnnaaa?
14 Cúú a-limbil kí taa sòoǹ tibɔkpitil,
kí ŋúb́ a-nyɔkɔ kí taa mɔ̄ntì.
15 Fàtī a-boon kí tīī ikpiti, kí ŋá tiŋan,
nyàab̀ ŋgbansɔŋfi kí nīn ŋúb́ an píkí.
16 Ti-Dindaan nimbil làaǹ deedeedambi pu,
ní u-tafal gbàkā ki pílifí bi-biilii.
17 Ama ti-Dindaan kaa gèetíǹ bikpitiŋaliibic,
u làá kpìtī bi-yiŋŋi kitiŋ pu.
18 Deedeedambi yaa gbáń ibiil ki yíiń ti-Dindaanee,
u gbìl̀ ní ki nyāntí-bi bi-gìŋ́ŋi kɔkɔ poon.
19 Ti-Dindaan bí ki pìlīǹ bin pɔbiliŋ bíil̀ee,
ní ki fìil̄ bin kaa ti cáá dimákaleed.
20 Deedeedaan kóò agìń tikpil poon,
ama ti-Dindaan di nyāntí-u ŋi-kɔkɔ poon.
21 Ti-Dindaan wúń u-kpabiŋ kɔkɔ pu,
báà dibaba kaa wīīe.
22 Unikpiti kpitii di làá kpɔ̀-u,
Unimbɔti làá dáaĺ bin ná deedeedambee tafal.
23 Ti-Dindaan fìil̄ u-tɔntɔnliibi,
dibɔkpil diba kaa ti dɔ̄ ki cí bin sáǹ ki kɔ́-uee.