Ilan 35

Maanyiibadaan un bi cáǹ ibɔsoonee gbaamii

1 Daafiidi di ŋmàn̄ nlan nee.

Ti-Dindaan, nín̄ ná bin ná-mee,

kí já nì bin jáà nì mee.

2 Yòon̄ agbampɔɔ kiwaai nì dikpaandi,

kí dāan̄ kí jòoń-mi.

3 Yòon̄ kikpaŋ nì kicɔkɔ kí kíntí bin bíi jì-mee.

Tùkù-mi yii: «Man di làá fīī-si».

4 Bin nyàab̀ kí kpɔ̀-mee, yàntī icoo ń cúú-bi bí fá bi-jilimau!

Bin dàkafī m-pu tikpitilee, yàntī bí tūlifì bi-boon nì icoo.

5 Yàntī ti-Dindaan tuuŋŋu yaa bīī bi-boon ki jì-bee,

bí nīn bí kii tifeel tin kubuŋu yòontí ki féeńee.

6 Ti-Dindaan tuuŋŋu yaa bíi jì-bee,

bi-saŋŋu ń kpántí dibɔmbɔndi nì dijɔnjɔndi.

7 Maa ŋá tiba ní bi gbìn̄ mbòó ki dū kulaaŋŋu ki píĺ yilpu,

maa ŋá tiba ní bi gbìn̄ mbòó m-pu.

8 Yàntī nnaabukpaan ŋubɔ ń jēetí bi-pu dicilpu dicilpu!

Yàntī kulaaŋŋu kun bi píĺee ń fàtīí sàl̄-bi,

ní nnaabukpaanee ń nàan̄-bi.

9 Niinee m làá dāá fàal̀ ti-Dindaan pu,

án làá dāá nīn mɔ̄ǹ-mi, kun puee u fīī-mi.

10 M làá lì nì m-pɔbil kɔkɔ yii:

«Ti-Dindaan, ŋma di bí kii sisee?

Sii un fìil̄ uwɔfi un pɔ̄ɔǹ-uee ŋaan,

ní ki fìil̄ unandaan nì ufalaadaan un mùul̄-uee ŋaanee.»

11 Nnyimɔn seeradambi yíkìi kāl̀ m-pu

ki bàlifī-mi tibɔti tin pu maa kpáàa nyée.

12 M yaa ŋá-bi tiŋanee, tikpitil ní bi dù kí téeǹ-mi,

bi-kɔkɔ dū-mi ki fá.

13 Bi nín nìn būǹee, m nìn dū kutuku ní ki pēeǹ

kí dàkà m-nimbaaku.

M nìn bōob̀ kinyɔkɔ

ní ki mèé kaa gbèentí,

14 a lì kii m-bɔɔ àá m-nabiki yaa būǹ m nín ŋáań puee.

M nìn còom̄ ní ki tīī ní ki sūǹ kii m-na di kpíìyee.

15 Ama ŋyunti ŋun m lítèe,

bíǹ māntìi tú-mi ní ki fàal̀.

Bi māntìi tú-mi kí já nì mi.

Binicambi bin maa nyée kúŋfí m-boon kaa gbèentí.

16 Bi bèel̄-mi ní kaa gbèentí,

ní ki gbìitī bi-nyiŋŋi m-pu.

17 Ti-Dindaan, a làá nīn kā ki kpèé

kí cáá sāā ŋyunti ŋulɔŋu ní?

Fīī-mi kí nyāntí dinimbinaamandi nee poon,

kí nyāntí agbikintipɔmbil nee ŋaan.

18 M làá jāam̀-si samaa kansikin,

diniwul kansikinee, m làá nyɔ̄ŋkì-si.

19 Taa yàntī bin ná-mi fámee ń nīn fàal̀ m-pu.

Taa yàntī bin kaa là kí wāl̀-mee ń nīn kábití tɔb ki lāā^a.

20 Di sá yii baa sòoǹ nì unil ŋgbansɔŋfi poon,

ama bi kúŋfí binib bin bí ŋgbansɔŋfin kitiŋ nee puee boon ní.

21 Bi wāaǹ bi-nyɔmmu bàaa m-pu

ki lī yii: «Ti-nimbil baasii ká-u ní!»

22 Ama sii ti-Dindaan ká tin jítèe,

taa nín̄ kā ki ŋmí.

Ti-Dindaan, taa nín̄ dátiǹ-mi.

23 Yīkì kí sòoǹ kí pɔ̀-mi, m-Nimbɔtiu,

yīkì kí mɔ̄tì m-pu, m-Dindaan.

24 A-deedeeu puee, pɔ̀-mi ti-Dindaan,

m-Nimbɔtiu, taa yàntī bí nīn fàal̀ m-pu.

25 Taa yàntī bí lì bi-pɔbilin yii: «Toooo! ti nín là puee sèé,»

kí taa yàntī bí lì yii: «Ti dū-u ki náĺ.»

26 Yàntī icoo ń cúú bin kɔkɔ

fàal̀ m-nimbinaamandi poonee!

Yàntī icoo ń kɔ́ bin dàkafī yii

bi jítiǹ-mee bí fá bi-jilimau.

27 Ama yàntī bin là kí ká yii bi pɔ̀n̄-mee

ń nīn bí mmɔn nì dipɔɔpindin.

Yàntī bí nīn lì ki bùsī yii: «Ti-Dindaan sá ukpaan.

An mɔ̄ǹ-u ú ŋá u-tɔntɔnliu tiŋan.»

28 M làá nīn sòoǹ a-deedeeu pu,

ní kí nīn nyɔ́ŋkí-si baabadal.