Ilan 36

Sii cee ní dimaŋfal nyánní

1 Ti-Dindaan tɔntɔnliu Daafiidi di ŋmàn̄ nlan nee ki tīī bilaŋgaaliibi kpiliu.

2 M téetí ukpitiŋal nyɔɔbuŋkpitiŋ pu,

úǹ ceeyee, á nīn fàŋkí Unimbɔtee kaa cáá taapu.

3 Di sá yii u cáǹ u-ba ŋkpaamin,

an puee waa ŋūǹ kí ká ikpiti iba u-ni kí nīn ná-i.

4 Ikpiti nì inyimɔn nyɔɔbuŋŋi ŋma di nyēē u-nyɔkɔn,

waa ti nyí tin bi yíì tiŋan diŋálee.

5 U yaa dɔ̄ u-dooŋu puee, tibɔkpitil ŋma ní u dàkafī.

U tàkā nsaŋkpiti pu,

waa yíití ikpiti.

6 Ti-Dindaan, a-neeŋkpaandi tin bàn̄ kutagbɔŋu,

a-baamɔŋyi tin tūū atagban.

7 A-deedeeu fɔ̀kɔ̀ ki jítì ajoofɔkɔ pu,

ní a nín sòoǹ binib bɔti nì ibaamɔn puee

nyóò kii nnyimbuuŋkpaanee.

Ti-Dindaan, a fìil̄ binib nì tiwaŋkuti.

8 Unimbɔti, a-neeŋkpaandi cáá kunyampooueeee!

Binib sáń ki kóò a-feeŋyi booŋŋu taapu.

9 A gbēentí-bi a-diikun gaajawanti,

ní ki yàntī bi nyù a-ŋanti tin pùub̀ kii mbunee.

10 Sii di tīī tiwan tin kɔkɔ bée dimaŋfal,

a-walfiŋun ní ti kāntí ŋwalifi.

11 Nín̄ gbíntìi nìkì ki néeń bin nyí-see,

ní kí nīn ŋáań bin pɔbiliŋ bí diba nì see tiŋan.

12 Taa yàntī ulambidaan ń kɔ́nní m-pu,

kí taa yàntī unikpiti ń jà-mi ḿ sāǹ.

13 Kpèè, bin ŋáań ikpitee lítì.

Bíǹ di dɔ̄ kaa ti ŋūǹ kí yīkèe.