Ilan 37

Nín̄ máká ti-Dindaan pu

1 Daafiidi di ŋmàn̄ nlan nee.

Taa gíí binikpitib pu diŋuul,

taa nín̄ cáá bikpitiŋaliibi pu nnimbitaataam.

2 Di sá yii an kaa làá sūŋkì bi làá yɔ́ĺ kii timoolee,

bi làá kpā kii timɔsɔn nín kōō puee.

3 Nín̄ máká ti-Dindaan pu kí nīn ŋáań tiŋan,

mimmee a làá kàl̄ kitiŋ nee pu nì ŋgbansɔŋfi.

4 An nīn mɔ̄ǹ-si ti-Dindaan pu,

ní ú tīī-si kun a-pɔbil fáatèe.

5 Dū a-bɔti kɔkɔ kí ŋá ti-Dindaan ŋaan,

nín̄ máká u-pu, u làá ŋá kí tīī-si.

6 U làá yàntī a-deedeeu ń nyā kí páań kii ŋwiinee,

ní binib ń ká a-baamɔŋyi kuwiŋkaŋu pu.

7 Ŋmīĺ fɔ́ŋfɔŋ ti-Dindaan nimbiin kí nīn máká u-pu.

Taa gíí unil un an bútèe

nì un mùul̀ee pu diŋuul.

8 Yàntī diŋuul, fá mbum.

Taa gíí diŋuul, án làá yàntī á ŋá ikpiti.

9 Di sá yii Unimbɔti làá kpɔ̀ kí céetí bikpitiŋaliibi,

ama bin máká ti-Dindaan puee di làá fōō

kitiŋ kin u pōoǹ-bee kí nīn kíǹ ki yì.

10 An kíǹ fiii unikpiti kaa ti làá nīn bí.

A làá dāá nyàab̀ laakin u nìn bée, ama kaa làá ti ká-u.

11 Ama bin sīntiǹ bi-ba taapuee làá dāá fōō kitiŋ kí nīn kíǹ ki yì^a,

ní kí nīn bí ŋgbansɔŋfin mmɔm.

12 Unikpiti dàkafī deedeedaan pu tibɔkpitil

ní ki gbìitī u-pu anyin.

13 Ama ní ti-Dindaan lāā-u,

di sá yii ŋwiin ŋun u làá dáaĺ u-tafalee tóobiń.

14 Binikpitib dáaĺ ki fɔ́fì ntàataajimu ki píĺ bi-tɔfii

kí kpɔ̀ unandaan nì ufalaadaan,

kí làntì bin ŋáań tin bí deedeeyee.

15 Ama bíǹ bi-ba jimmu di làá fàtīí sāā bi-pɔbiliŋ,

ní bi-tɔfii ń kɔ̄fì.

16 Fiii un deedeedaan cááyee sɔ́ǹ

tigaajati tin binikpitib tikpil cááyee.

17 Di sá yii binikpitib pɔŋŋu làá nàan̄,

ama ti-Dindaan di tíkí deedeedambi.

18 Ti-Dindaan di nyí bin sí nì u deedeeyee wiiŋyi,

ní kitiŋ kin bi fōō difakalee làá nīn bí ki cá talku.

19 Dinimbinaamandi yuntiŋuee, icoo kaa làá jī-bi,

ŋkùm mun yuntiŋuee, bi làá ká kí jī kí díkí.

20 Tiŋman, binikpitib làá kpú kí céetí,

ti-Dindaan nannanliibi làá nīn bí

kii kumooun supumpukumee ní.

Bi làá wāŋkì, bi làá wāŋkì kii nnyiimee.

21 Unikpiti pìntí ní kaa tēentí,

ama deedeedaan úǹ poon mɔ̄ ní u tìì.

22 Bin boon ti-Dindaan bīiǹee di dāa yì kitiŋ,

ama u làá dāá kúntí bin u tɔ́ mbusuee.

23 Unil un bimbim fáatiǹ ti-Dindaanee,

u yàntī udaan còom̄ ní kaa fàŋkí tiba.

24 Báà udaan yaa gbéetì, waa làá lítí,

di sá yii ti-Dindaan ŋúb́ u-ŋal.

25 M nìn sá unaacimpɔɔn ní kɔŋkɔnnee ki púĺ,

ama maa láá pée ká ti-Dindaan dū deedeedaan ki fá,

àá udaan biyaamu bí ki mèé tijin ki jīǹ.

26 Baabadalee, úǹ sūǹ binib saai ní ki pìntí,

ní u-biyaamu sá dibiindi.

27 Fàtī a-boon kí tīī ikpiti kí ŋá tiŋan,

ní kí kàl̄ kitiŋ nee pu kí nīn cá jaanjaan.

28 Di sá yii ti-Dindaan néeń bí nīn sòoǹ binib bɔti nì ibaamɔn,

ní kaa féeń bin sí nì u deedeeyee.

U cí-bi ní baabadal,

ama u làá kúntí binikpitib nibooliŋu.

29 Deedeedambi làá dāá fōō kitiŋ kí nīn yì,

ní kí kàl̄ ki-pu kí nīn cá jaanjaan.

30 Deedeedaan nyɔkɔn ní iciin nyɔɔbuŋŋi nyēē,

ní u-limbil sòoǹ binib bɔti nì ibaamɔn.

31 Unimbɔti marab kā u-pɔbilin,

u kpá kí tāā kí pántí.

32 Binikpitib cɔ́ŋkí deedeedaan,

ní ki nyàab̀ kí kpɔ̀-u.

33 Ama ti-Dindaan kaa làá dū-u kí ŋá bi-ŋaan.

Bi yaa tí bíi sòoǹ u-bɔtaaa, waa làá yàntī bí kpɔ̀ u-bɔti.

34 Nín̄ máká ti-Dindaan pu kí nīn nóó u-saŋŋu.

U làá yòon̄-si yilpu á fōō kitiŋ nee kí nīn kíǹ ki yì,

ní kí ká u nín làá kúntí unikpiti puee.

35 M ká unikpiti ubɔ cáá u-pɔŋŋu ki fàantí binib,

u nìn wíiǹ kii busukpaambuee ní.

36 Ama m jítì niinee, waa ti bí.

M nyàab̄-u, ama maa ti ká-u.

37 Dáań ubulcindaan, kpèè deedeedaan.

An niliuee kúntí ŋgbansɔŋfin ní.

38 Ama Unimbɔti làá kúntí pɔɔgaatib dicilpu,

ní kí kpɔ̀ kí céetí binikpitib naantiibi.

39 Deedeedambi fiil nyēeń ti-Dindaan cee ní.

Dinimbinaamandi yuntiŋuee, úǹ ní bi sáń ki kóò.

40 Ti-Dindaan di tútúǹ-bi ní ki jòoń-bi.

U nyāntí-bi binikpitib ŋaan ní ki fìil̄-bi,

kun puee bi sáǹ ki kɔ́-u.