Ubunli un di béè u-yìntitamee wimmeem
38
1 Daafiidi di ŋmàn̄ nlan nee kí nīn téetí Unimbɔti pu.2 Ti-Dindaan, taa wòoǹ-mi nì diŋuul,
taa dū mbum kí dáaĺ m-tafal.
3 A dū a-piiŋyi ki yá-mi,
ní ki dū a-ŋal ki fáá-mi ki lúkú.
4 A-ŋuul puee m-wunti kaa ti pɔ̄ɔ̄,
m-kpitii puee m-kpabiŋ kaa ti pɔ̄ɔ̄.
5 Di sá yii m-kpitii kpúkú ki jítì m-yil pu,
i nyìm̀ m-pu kii diwaŋgul din nyìm̀ee ní.
6 M-gbaandi puee,
m-buuŋyi sūū ki núù.
7 M-weeŋyi nyīī-mi ki bōoǹ taapu taapu,
baabadalee m còom̄ kunimbaaun ní.
8 Di sá yii m-wunti píl̀ kpaŋkpam,
ní m-wunti kaa ti pɔ̄ɔ̄ báà fiii.
9 Maa ti cáá mpɔn ní an nùkū-mi púsi pusi.
M-pɔbil kɔ́ kunimbaaun ní m yáliŋkí.
10 M-Dindaan, kun m lèe dɔ̄ a-nimbiin,
a nyí m-yaliŋkii.
11 M-pɔbil máfí, mpɔn kaa ti bí-mi,
m-nimbiliŋ gba kaa ti wāĺ tiŋan.
12 M-bɔɔbi nì man nì bin nōotée
kíǹ ki sáń-mi m-buuŋyi pu.
M-dicaŋkun yab gba kaa ti là kí sútí kí pìl̄-mi.
13 Bin là kí kpɔ̀-mee pīil̀-mi titalindi.
Bin nyàab̀-mi tikpitilee sòoǹ ki mɔ̀tīi púntí-mi,
ní ki cáá m-pu disambiil baabadal.
14 Ama mamee, m kpántì kii utafakpaafuee ní, maa gbìl̀ tiba.
M kpántì kii umuunee ní, maa gàtī tiba.
15 Tiŋman m kpántì kii unil un kaa gbìl̀ee ní,
unil un kaa cáá kinyɔkɔ kí gàtī tibee.
16 Ama sii pu ní m máká, ti-Dindaan,
sii ti-Dindaan m-Nimbɔtiu di làá kíí.
17 Di sá m mēē yii: «M yaa gbéetìi lítèe,
á taa yàntī bí nīn fàal̀
kí jī m-pu dinyandi».
18 Too man di làá lítée,
ní m-wàlifii dáá gbíntìi bí m-ni.
19 M bīitì m-yìntitam pu,
m-kpitii fàantí-mi.
20 M-nannanliibi cáá laafiya ki cáá mpɔn,
bin ná-mi an kaa cáá taapuee wīikí tikpil.
21 Bi cáá ikpiti ki pà tiŋan tin m ŋáań-bee,
kun puee bi wòoǹ-mi yii m pá tiŋan boon.
22 Ti-Dindaan, taa dū-mi kí fá,
m-Nimbɔtiu, taa nín̄ dátiǹ-mi.
23 Ŋá malaa kí dāá jòoń-mi,
ti-Dindaan, m-fiiliu.