Ilan 60

Unimbɔti, pīlifì a-nibul kuŋkuuntii

(B. 7-14. kpèè 108.7-14)

1 Daafiidi di ŋmàn̄ nlan nee ki tīī bilaŋgaaliibi kpiliu bí nīn cáa dàkà. Bi bɔ̀ɔ́ kubeeu ní ki gà-ŋu. 2 Daafiidi cūtìi jáń nì Aram yab bin kóò Meesoopootamii nì Sooba timmunee. Bi nín kūnnée, Joowaab fātìi gítì ki kūū Eedoom yab binib kutukub saalaa nì bili Ŋyaam tantakalin^a. Niinee ní Daafiidi lī yii:

3 Unimbɔti, a dū-ti ki fá, ki yāntì ti yàl̄.

Min kamaa a gíí ti-pu diŋuulee, fàtīí tīī-ti mpɔn.

4 A yāntì kitiŋ cīŋkì ki fáá iwèeń,

fàtīí ŋéeb́ ki-wèeŋ́yi, di sá yii kàa ti yú ki pɔ̄ɔ̄.

5 A yāntì a-nibul jíń falaa tikpil,

a yāntì ti nyùn̄ ndaam min pɔ̄ɔ̄yee^b.

6 A tīī bin fàŋkí-see kudaaŋŋu bí sāǹ

ipiin ń taa cúú-bi.

7 Dū a-pɔŋkpaaŋŋu kí fīī-ti kí fōō ti-wimmeem,

án nín làá ŋá pu a-nib bin a néeńee ń ká difiilee.

8 Unimbɔti sòon̄ u-circir diiku poon.

M jáń ki jíń! M làá yàkatī Siikeem tiŋki,

ní kí ŋmàntī Sukooti tantakal.

9 Man di yì Galaadi, man di tí yì Manasee mun.

Eefiraayiim di sá man janjafuuliiki,

ní Juuda sá m-beel pɔŋŋu.

10 Moowaab sá kusampeeu kun poon m fùul̀ee ní.

M tákatì m-naatakal ki lúkú Eedoom tiŋki pu^c,

m fátí dijajil kuŋkuuntii Fiiliistii tiŋki pu.

11 Ŋma di làá cùnnì-mi kitiŋ kin bi máń digundi ki túee poon ní?

Ŋma di làá cùnnì-mi Eedoom tiŋkin,

12 an kaa sá sii Unimbɔti un di dū-ti ki fá,

kaa ti cēentí ti-janjakitiŋeeee?

13 Dāá tūtuǹ-ti tí já nì unannanli,

di sá yii unil tūtuntam sá fám ní.

14 Unimbɔti yaa bí ti-ceeyee, ti làá já kí jī,

úǹ di làá tāā kí mátí ti-nannanliibi.