Ilan 61

M bàà là kí nīn kóò ti-Dindaan diikun baabadal

1 Daafiidi di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ kubeeu ní ki gà-ŋu.

2 Unimbɔti, pīlifì m-biilii,

kpòon̄ a-tafal kí pīlifì m-wimmeem.

3 Doooo kitiŋ gbeennyɔkɔ,

ŋyunti ŋun m-pɔbil bíil̀ee,

m kúuǹ ki yíiń-si á jòoń-mi.

Cáá-mi kí cùnnì ditaŋkpal din fɔ̀kɔ̀ maa ŋūǹ kí bà nee cee.

4 Di sá yii sii ní m sáń ki kóò,

a sá digunlɔkɔl din pɔ̄ɔ̄yee ní m-nannanliibi nimbiin.

5 M bàà là kí nīn kóò a-circir kɔŋkooŋŋun baabadal,

ní kí ká kibalilaŋ a-feeŋyi taapu.

6 Unimbɔti, sii di gbìl̄ m-pooŋyi,

ní ki tīī bin fàŋkí a-yindee kun bi lèe.

7 Kūtì ubɔti mmaŋfafɔkɔn,

yàntī ú kàl̄ kitiŋ pu doo kí yúntí tikpil tikpil!

8 Ú nīn pée kā dibeel pu ki cá jaanjaan a-nimbiin.

Yàntī a-neeŋkpaandi nì a-baamɔŋyi ń nīn wúń u-pu.

9 Niinee m làá nīn gà ilan baabadal ki nyɔ́ŋkí-si,

ní kí nīn ŋúb́ m-pooŋyi baabadal.