Ilan 62

M yaa pìlīǹ Unimbɔtee, m-pɔbil sɔ̀m̀ ní

1 Daafiidi di ŋmàn̄ nlan nee ki tīī bilaŋgaaliibi kpiliu.

2 Unimbɔti cee ní m kāntí dipɔɔsɔŋkil.

U-cee ní m-fiil nyēeń.

3 Úǹ di sá m-taŋkpanaakooku nì m-fiil.

U sá m-balilaŋki, tiba kpá kí cìŋkì-mi.

4 Kí cáá sāā ŋyunti ŋulɔŋu ní ni làá kpāfì

kí lùkù unibaanti kí líí-u

kii digundi din wāntèe,

àá kunaabakau kun bíi lítée ní?

5 Tinyool paaŋŋu ŋun pu u bée pu

ní ni bí ki mɔ̀ kí kpákatí-u.

Kun pée mɔ̄ǹ-nee di sá inyimɔn.

Ni mèé kinyɔkɔn fám ní ki bìintí,

ama ni-pɔbiliŋ poonee, ni tòó mbusu.

6 Unimbɔti cee ní m kāntí dipɔɔsɔŋkil,

u-cee ní m-mákal nyēeń.

7 Úǹ di sá m-taŋkpanaakooku nì m-fiil.

U sá m-balilaŋki, tiba kpá kí cìŋkì-mi.

8 Unimbɔti di fìil̄-mi ki tìì-mi tinyool.

Úǹ di sá m-taŋkpanaakooku nì laakin m sáń ki kóòyee.

9 Nimbi m-nibul, nín̄ mákámaan u-pu ŋyunti kamaa!

Dūmaan tin páb́-nee kí bíĺ u-nimbiin.

Unimbɔti ní ti sáń ki kóò.

10 Unil sá kii kubuŋuee ní,

bikpaambeeee, ŋwaamueeee, ubɔ kaa bí tiban.

Dū bi-kɔkɔ kí páań saniya pu kí ŋmàntī,

bi-nyiŋfiŋu kaa làá bà kufoou nyiŋfiŋu gba.

11 Taa nín̄ mákámaan tipɔmbɔti pu,

kí taa nín̄ máká tiwan tin ni fìkēe pu.

Báà ni-gaajati yaa bíi wīintáaa,

ní taa nín̄ máká ti-pu.

12 Unimbɔti sòon̄ tibɔti tiba,

u sòon̄ tibɔliliitiil tiba mun m gbìl̄,

yii: «Unimbɔti di yì mpɔn.»

13 Sii ti-Dindaan di cáá dineeŋkpaandi,

ní ki pà báà ŋma u-tuuŋŋi paati^a.