Ilan 63

A-ŋanti jítiǹ dimaŋfal

1 Ŋyunti ŋun Daafiidi nìn bí Juuda teekunee ní u ŋmàn̄ nlan nee^a.

2 Unimbɔti, sii di sá m-Nimbɔtiu! M baasii nyàab̀-si ní.

Kii nnyinnyoo nín cútí unil u nyàab̀ nnyim puee,

míǹ ní m nyàab̀-si.

M fèefī ki nyàab̀-si,

kii kitiŋ kin kūń búkú buku, nnyim kpá ki-puee ní.

3 M nyàab̄-si a-kɔŋkooŋŋun,

ki pée nyàab̀ kí wāl̀ a-pɔŋŋu nì a-nyooti.

4 Di sá yii a-ŋanti jítiǹ dimaŋfal,

an puee m làá nyɔ̄ŋkì-si.

5 M làá nīn jáaḿ-si m-maŋfal wiiŋyi kɔkɔ poon,

ní kí nīn yòontí m-ŋalii yilpu^b ki mèé-si.

6 M làá jī tijimmɔntiil kí díkí,

ní kí gāā ilan nì dipɔɔpindi kí nyɔ̄ŋkì-si.

7 M yaa dɔ̄ m-dooŋu puee, m téetí a-pu,

ní ki mèé-si kunyamɔŋu kɔkɔ.

8 Di sá yii sii di jòoń-mi,

ní m gāā ilan nì dipɔɔpindi a-feeŋyi booŋŋu taapu.

9 M dū m-ba kɔkɔ ki nákáǹ-si,

ní a-ŋaŋgiil tíkí-mi.

10 Án nàan̄ bin nyàab̀ kí lēē m-maŋfalee!

Bí sìntī taapu ditaŋkpiilin!

11 Yàntī bí kpɔ̀-bi kujaau poon,

bí kpántí sinsiŋkub jinti!

12 Ubɔti ń nīn fàal̀ Unimbɔti pu!

Bin yíì Unimbɔti yindi ki pùtēe ń nyɔ̄ŋkì-u,

di sá yii u làá pìin̄ binyimɔndambi nyɔmmu.