Unimbɔti làá dáaĺ bin sòoǹ ki bíiĺ binibee tafal
64
1 Daafiidi di ŋmàn̄ nlan nee ki tīī bilaŋgaaliibi kpiliu.2 Unimbɔti, pīlifì m-yaliŋkii.
Fīī-mi kí nyāntí unannanli un m fàŋkée ŋaan.
3 Fīī-mi kí nyāntí binikpitib nín bíi bɔ́ntí m-pu puee,
nì bikpitiŋaliibi nín bíi kpáfí m-pu miŋyee poon.
4 Bi-limbiliŋ jītí kii bɔlfee,
ní bi-nyɔɔbuŋŋi cáá tilool kii ilɔpiinee.
5 Bi bāal̀ kí tɔ̄ deedeedaan mpiin.
Bi tòó-u dicilpu niin, kaa fàŋkí tiba.
6 Bi tìì tɔb kunyannyaau bi-tuŋkpitiŋ poon,
ki sòoǹ titalindi tin bi làá píĺ dibalinee pu
yii: «Ŋma di làá wāl̀?»
7 Bi bɔ́ntí atuŋkpiti ŋin bi làá ŋée.
Bi lì yii: «Ti bɔ́ntì ti-tundi nee tiŋan:
ubɔ kaa ŋūǹ kí béé kun kā unil pɔbilinee!»
8 Ama Unimbɔti làá tɔ̄-bi u-piiŋyi.
Dicilpu niinee, bi fōō tiweendi.
9 Bíǹ bi-ba nyɔɔbuŋŋi di fātìi gítì bi-pu.
Bin kɔkɔ làá dāá ká-bee dāa gàatī bi-yiliŋ ní.
10 Báà ŋma làá dāá fàŋkì.
Binib làá dāá māafì tin Unimbɔti ŋée,
ní kí dāá gbìl̄ tin u ŋée taapu.
11 Deedeedambi ń nīn fàal̀ ti-Dindaan pu,
bí sāǹ kí kɔ́-u,
ní bin kɔkɔ pɔbil bí diba nì Unimbɔtee ń nyɔ̄ŋkì-u.