Ilan 65

Unimbɔti, a máaǹ inyɔŋki

1 Daafiidi di ŋmàn̄ nlan nee ki tīī bilaŋgaaliibi kpiliu. Nlan.

2 Unimbɔti un bí Siiyɔn tiŋkinee,

an máaǹ tí nyɔ̄ŋkì-si,

ní kí ŋá min ti pōoǹ-see.

3 Di sá yii a fòol̄ binib wimmeem.

Unil kamaa dòoń a-cee.

4 M-kpitii nyìmiǹ-mi,

ama a cáá ti-kpitii kɔkɔ ki pūǹ-ti.

5 Unil un a lēē ki yíiń ú dāan̄ a-ceeyee bí mmɔnneeee!

Udaan làá nīn kóò a-kɔŋkooŋŋun.

Ti làá dāá fōō tiwammɔntiil tin bí a-diikunee,

circir wanti tin bí a-kɔŋkooŋŋunee.

6 Unimbɔti ti-fiiliu, a sá deedeedaan,

a cáá maamaaci tuuŋŋi ki fòol̄ ti-wimmeem.

Kitiŋ kɔkɔ pu nib

nì tiŋkub bin bíń ndandatee máká sii pu ní.

7 Nì a-pɔŋŋu ní a dūu báaǹ ajoon ní ŋi bá ki pɔ̄ɔ̄,

kun puee a dū mpɔn ki gbìn̄ a-caŋ kii gbajee.

8 A pèefī tiŋkub wooku,

ki pèefī bi-nyiŋgbanti fuuku,

nì inibool kuŋkuuntii.

9 A-maamaaci tuŋkpaaŋŋi ŋin a ŋée puee,

duulinya nib kɔkɔ fāŋkì.

A yàntī ŋwìiń nyalaŋki pú nì ŋwìiń jeetilaŋki pú

timmu kūuntí nì dipɔɔpindi.

10 A kpèé kitiŋ, ki sɔ̀ŋkī-kì ntaanyim,

ki gbéeǹ-kì tigaajati.

Unimbɔti, nnyim gbí a-buŋŋu^a,

a yàntī kitiŋ lòoǹ tikpaajin tiŋan,

min ní a bɔ́ntí-kèe dee.

11 A yàantí ki-pɔŋyi,

ki kpátí ki-tannaapikiŋ,

ki yàntī utaa nì ki sɔ̀ŋkī-kì,

ní ki tìì iwambool mpɔn í nyā.

12 A yàntī dibindi kúntí tiŋan

laakin kamaa a yaa jítèe, digbíl pùub̀ ní.

13 Kuteeu pu naakpaapɔɔku mun cáá tigaajati tibaantiil ní,

ní mmɔn māntìi tú ŋgbantamu.

14 Tiwaŋkuti kpátìi gbí kunaakpaapɔɔun,

ní tikpaajin bīī atantaka pu,

tikɔkɔ kūuntí nì mmɔn ki gà ilan.