Tí nyɔ̄ŋkì Unimbɔti ufiil
66
1 Bilaŋgaaliibi kpiliu laŋŋu. Nlan.Kitiŋ pu kɔkɔ nib, fáámaan ŋwiliili kí nyɔ̄ŋkì Unimbɔti.
2 Gāāmaan ilan kí nyɔ̄ŋkì u-yindi,
dūmaan inyɔŋki laŋyi kí tīī-u tinyool.
3 Ní lì Unimbɔti yii: «A-tuuŋŋi sá maamaaceeee!»
A-pɔŋŋu nín sá ŋkpaan puee, a-nannanliibi pàkà-si.
4 Kitiŋ pu nib kɔkɔ gbàantí a-nimbiin ki jáaḿ-si.
Bi gà ilan ki nyɔ́ŋkí-si,
bi gà ilan ki nyɔ́ŋkí a-yindi.
5 Dāá kpèèmaan tin Unimbɔti ŋée,
u-tuuŋŋi kɔ̄ntí binib dinyoondi.
6 U yāntì tiŋku fóotì ki kpántì kitiŋkuliŋŋi,
binib dūtì dimɔɔl ŋkulimmia.
An puee tí fàal̀ tin u ŋá nee pu.
7 Nì dibaatandi ní u jīǹ dibeel ki cá talku.
U kpèé ki wāĺ atimbun kɔkɔ.
Bin jáà nì uee ń taa nín̄ yòontí bi-ba yilpu!
8 Anibul kɔkɔ, jāam̀maan ti-Nimbɔtiu,
nyɔ̄ŋkìmaan-u mpɔn mpɔn.
9 Úǹ di yāntì ti bí dimaŋfalin
ní kaa yāntì ti-taaŋi ŋātì.
10 Unimbɔti, a cɔ́ŋkì-ti ki kpēē.
A cɔ́ŋkì-ti ki kpēē kii bi nín ŋáań sindaariya ŋŋmin
kí cɔ̄ŋkì-u kí kpèè puee ní,
míǹ ní a cɔ́ŋkì-ti.
11 A cáá-ti ki kɔ́ǹ kulaaŋŋun,
a dū awaŋgul ŋin nyìm̀ee ki túǹ-ti.
12 A yāntì bitanjakaliibi dū itaamu ki tāā ti-yiliŋ pu ki jítì.
Ti kɔ́ ŋŋmi nì nnyimin,
ama a nyántì-ti ki kɔ́ǹ digbíl poon.
13 M làá cáań bisaraawɔkaabi a-diikun,
m làá ŋá tin m pōoǹ yii m làá ŋá kí tīī-see.
14 M làá cáań tin nìn nyáń m-nyɔkɔn
ŋyunti ŋun m nìn bí dinimbinaamandinee kí tīī-si.
15 M làá dū tiwaŋkuti tin cáá ŋkpamee
kí ŋá saraawɔkaa kí tīī-si.
M làá dū ipijaa kí ŋá saraa kí wà ŋŋmi,
m làá dū inajaa nì iŋɔjaa kí ŋá saraa.
16 Nimbi bin kɔkɔ fàŋkí Unimbɔtee, dāá pīlifìmaan,
m làá māafì-ni tin ní u ŋá ki tīī-mee.
17 M fáá mbiil ki yíiń-u,
ní ki kíĺ ki bíi nyɔ́ŋkí-u.
18 M yaa bàà cáá ilandɔkɔkpiti m-nee,
ti-Dindaan kaa bàà pílifíǹ-mi.
19 Ama Unimbɔti pílifiǹ-mi,
u kpōoǹ u-tafal ki pílifì m-wimmeem.
20 Tí jāam̀ Unimbɔti,
kun puee waa fātì u-boon ki tīī m-wimmeem,
ní kaa ŋmīntì-mi u-ŋaŋkpaanti.