Ilan 67

Anibul kɔkɔ ń nyɔ̄ŋkì-si

1 Bilaŋgaaliibi kpiliu laŋŋu. Bi bɔ̀ɔ́ tibati ní ki gà-ŋu. Nlan.

2 Unimbɔti, sɔ̄ ti-saai kí bìin̄ ti-pu.

Bútí ti-pu nnimbiin,

3 án nín làá ŋá pu binib ń béé kitiŋ pu min a lèe,

ní atimbun kɔkɔ ń béé yii a sá ufiil.

4 Unimbɔti, anibul ń nyɔ̄ŋkì-si,

anibul kɔkɔ ń kpāfì kí nyɔ̄ŋkì-si!

5 Atimbun kɔkɔ ń gāā ilan nì dipɔɔpindi,

di sá yii a sòoǹ binib bɔti nì mbaamɔn ní,

ní ki kpòotī atimbun ŋin kɔkɔ bí kitiŋ puee.

6 Unimbɔti, anibul ń nyɔ̄ŋkì-si,

anibul kɔkɔ ń kpāfì kí nyɔ̄ŋkì-si!

7 Kitiŋ lòon̄ tikpaajin,

Unimbɔti, ti-Nimbɔtiu ń bìin̄ ti-pu!

8 Unimbɔti ń bìin̄ ti-pu,

ní kitiŋ kɔkɔ pu nib ń fàŋkì-u!