Ilan 68

Unimbɔti ujajil laŋŋu

1 Daafiidi di ŋmàn̄ nlan nee ki tīī bilaŋgaaliibi kpiliu. Nlan.

2 Unimbɔti ń yīkì u-nannanliibi ń yàl̄,

bin ná-uee ń sāǹ u-nimbiin.

3 Kii ŋŋminyiim nín wáŋkí puee, yàntī bí wāŋkì míǹ,

kii kisikampiŋ nín dùntī ŋŋmin puee,

míǹ ní an nàantí binikpitib Unimbɔti nimbiin.

4 Ama ní deedeedambi bí mmɔnni,

bi fàal̀ Unimbɔti nimbiin, ní ki bí dipɔɔpindin!

5 Gāāmaan ilan kí tīī Unimbɔti,

gāāmaan ilan kí nyɔ̄ŋkì u-yindi,

cátímaan nsan kí tīī un kā u-janjatɔrɔkuu

pu ki páaǹní atagbannee^a.

U-yindi di sá ti-Dindaan, nín̄ fàal̀maan u-nimbiin!

6 Unimbɔti un di kóò u-circir kɔŋkooŋŋunee

sá ataŋkpiibil baa nì un mɔ́tí bikpiipoobi puee ní.

7 Unimbɔti di tìì un kaa cáá ubɔee kudicaŋu,

ní ki tìì bisarkadambi mmɔn nì dibatɔl.

Ama bin jáà nì Unimbɔtee kóò kitiŋkuliŋŋi pu ní.

8 Unimbɔti, ŋyunti ŋun a nìn nyáń ki līntì a-nibul nyɔkɔpuee,

ŋyunti ŋun a nìn dū a-ba ki bíl̀ kuteeu puee,

9 kitiŋ nìn cīŋkì ní kutagbɔŋu cōotì^b

Unimbɔti un sá Siinaayi jool Nimbɔtiuee nimbiin,

Unimbɔti un sá Isirayeel Nimbɔtiuee nimbiin.

10 Unimbɔti, a nìn yāntì utaa nìn̄ tiŋan pu,

a-nibul nìn gīī ní a fātìi tīī-dì mpɔn.

11 A-tiŋki pu ní a-nib kāl̀,

a-ŋanti poonee, Unimbɔti,

a bɔ́ntì mpaan gbanti ki tīī bifalaadambi.

12 Ti-Dindaan tīī mara,

ní binimpoobi bin sòoǹ tibɔmɔntiilee dūu ŋá dikitikpaandi.

13 Bibɔtiibi nì bi-janjakitiŋi sáǹ sáǹ,

ní binimpoobi bin kíǹ mmɔŋkee yākatì tin bi sáǹ ki fée.

14 Ni dáá gbíntìi dɔ̄ kunaabakaunaaa?

Animbil kúti náká náká dibeenanjil feeŋyi pu,

ní sindaariyasoon náká náká di-kuti pu.

15 Ŋyunti ŋun Unimbɔti Mpɔŋkɔdaan nìn bíi jì ki yàantí bibɔtiibee,

ntaayim nìn bíi lítí Saalmɔn jool pu.

16 Baasan jool sá Unimbɔti jool ní,

Baasan jool sá dijool din cáá yilpu kúnti kunti wīikée.

17 Kin ba pu ní sii, dijool din cáá yilpu kúnti kunti wīikée

ŋáań dijool din Unimbɔti lēē kí nīn kóò di-puee ipoompoon?

Tiŋman, Unimbɔti làá nīn kóò niin ní talku.

18 Unimbɔti cáá janjatɔrɔkub kutukub kutukub cutimaanyi.

Ti-Dindaan bí bi-kansikin,

Siinaayi jool din bí circir laŋkee pu.

19 Ti-Dindaan Unimbɔti, a jɔ́m̀ yilpu niin kí nīn kóò.

A cúú binib bi kíǹ ki sá bisarkadambi.

Binib cáań-si tiwampɔkaal, ki kpáaǹ bin kaa tɔ́-see.

20 Tí jāam̀ ti-Dindaan ŋwiin kamaa!

U sá Unimbɔti ti-fiiliu un tūntí ti-gìŋ́ŋi ki tìì-tee ní.

21 Ti-Nimbɔtiu sá Unimbɔti un fìil̄ee ní.

Úǹ ti-Dindaan Unimbɔti di cáá mpɔn

kí fīī-ti kí nyāntí ŋkúmin.

22 Ama Unimbɔti làá wìil̀ u-nannanliibi yiliŋ,

nì bin tú tiyikpifɔkɔl ki sá binikpɔliibee yaŋ.

23 Ti-Dindaan bí yii: «M làá yòon̄ní-bi Baasan jool pu kí gíiǹní,

m làá nyāntí-bi dimɔɔl taapu kí gíiǹní,

24 án nín làá ŋá pu á còom̀ fatiku poon,

ní a-booi ń ŋmɔ́ a-nannanliibi nantee.»

25 Unimbɔti, ti ká binib nín còom̄ ki pàkà-si puee.

M-Nimbɔtiu, m-bɔtiu bi còom̄ ki kóò a-kɔŋkooŋŋun.

26 Bilaŋgaaliibi līī, ní biwambɔɔliibi lúŋkì,

ní bisapɔmbi bí kansikin ki cákafí cancakantib.

27 Ní jāam̀maan Unimbɔti ni-kooŋyi poon,

nimbi bin nyeeŋu sá Isirayeelee,

ní jāam̀ ti-Dindaan.

28 Upeepeekaa di sá Beenjameen, ujipɔnjoolkaa naakooku,

ní Juuda bɔtibiliŋ ŋin pēē abɔkuti ŋin bi gbáńee ń páań,

ní Sabulɔn nì Neefitalii bɔtibiliŋ ń lūŋkì.

29 Unimbɔti, dàkà a-pɔŋŋu,

Unimbɔti, dàkà a-baatandi, sii un di túń atuŋkpaan ki tīī-tee.

30 A-diiku kun bí Jeerusaleemee puee,

bibɔtiibi làá dāá cáań-si bi-wampɔkaati.

31 Kpàtī tikatin waŋkuluku pu,

inajaa nacaŋkpuŋku pu,

kí kpáaǹ anibul ŋin bí kii anabil nee pu.

Bi gbàantí ki tìì-si animbil kúti.

Gbá kí yàaǹ anibul ŋin néeń kujaau nee.

32 Bikàliŋkpaambi nyánní Eejipiti ki dɔ́miń,

Eetiiyoopii yab tāntì bi-ŋalii ki túĺ Unimbɔti watil pú.

33 Kitiŋ pu beeŋi, gāāmaan ilan kí nyɔ̄ŋkì Unimbɔti,

nyɔ̄ŋkìmaan ti-Dindaan

34 un jàkāń doooo cannaaku tagbɔŋku yilpuee.

Pīlifìmaan, u tátiń mpɔmpɔn.

35 Sòom̀maan Unimbɔti pɔŋŋu pu.

U jīǹ Isirayeel pu dibeel,

ní u-pɔŋŋu bí atagbanni.

36 Unimbɔti, a cáá tifaandi a-circir kɔŋkooŋŋun.

An sá Isirayeel Nimbɔtiu

di tìì u-nibul dikpabil nì mpɔn.

Tí nyɔ̄ŋkì Unimbɔti!