Ilan 69

Unimbɔti, m néeń a-diiku

1 Daafiidi di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ tibati ní ki gà-ŋu.

2 Unimbɔti, fīī-mi,

nnyim jɔ́m̀ ki sāā m-neen.

3 M nín sìntī tikpatin taapu taapu,

ní m-taaŋi kaa gbèetī kitiŋ.

M bí nnyim min nyóòyee poon,

ní nnyinjil bíi yòontí-mi.

4 M gbáń ibiil ki tin gīī,

m-neen séeb́.

M nín kā ki kpèé a-saŋŋu pú puee

yāntì m-nimbiliŋ gīī.

5 Bin pée ná-mi fámee^a

wīikí ki jítiǹ m-yil pu yikpiti.

M-nannanliibi tūntí-mi abɔgabil,

ní bi lafun cáá mpɔn kí nàan̄-mi.

Tin maa yùn̄ee ní bí bí yii ḿ nyàab̀ kí téeǹ.

6 Unimbɔti, a nyí m-gbaandi pu,

ní m-yìntitam kaa lìkī a-cee.

7 Ti-Dindaan Unimbɔti Mpɔŋkɔdaan,

taa yàntī man puee, icoo ń cúú bin máká a-puee.

Isirayeel Nimbɔtiu, taa yàntī man puee,

bí sìì bin nyàab̀-see.

8 Di sá yii sii pu ní bi sìí-mi,

ní m-yil tīī kaa yáatí.

9 M kpántì m-nabiyaamu cee unicaan,

ní man nì bin pēē dinabiilee kaa ti nyí-mi.

10 Dineendi din m cáá a-diiku puee

fòol̄ m-pɔbilin lìblib kii ŋŋmee.

Asiibil ŋin bi sìí-see fàtīi gítiń man pu ní^b.

11 M súń ki bóob́ kinyɔkɔ,

ama ní binib sìí-mi.

12 M dū kutuku ki pēeǹ kí dàkà m-nimbaaku,

ní m-bɔti kpántì nlan bi gà.

13 Kpacantib puɔɔɔ, man bɔti ní bi sòoǹ,

áli gba bidanyɔgbiliibi gà-mi ilan.

14 Ama mamee, sii ti-Dindaan ní m bíi mèé,

ŋyunti nee ní a máaǹ kí pīlifiǹ-mi.

Unimbɔti, a-ŋanti wīikí tikpil,

kíí-mi, di sá yii sii di sá difiil tiŋman pu.

15 Nyāntí-mi tikpati nee poon ḿ taa múĺ.

Nyāntí-mi bin ná-mee ŋaan,

nì mbúun nee poon.

16 Taa yàntī nnyinjil nee ń yòon̄-maaa,

mbúun nee ń dū-mi kí náĺaaa,

dikaakul nee mun ń dūú bìin̄ m-pu.

17 Ti-Dindaan kíí-mi, di sá yii a-neeŋkpaandi ŋān̄.

A-poommɔŋŋu puee, fàtī a-ba kí túĺ-mi.

18 Taa fàtī a-boon kí tīī man a-tɔntɔnliu.

M bí dinimbinaamandin, kíí-mi malaa.

19 Sútí kí pìl̄-mi kí fīī-mi.

M-nannanliibi puee, fīī-mi.

20 A nyí bi nín sìí-mee,

a nyí m-cooi nì bi nín sòoǹ ki bíiĺ-mi puee,

a nyí m-nannanliibi kɔkɔ.

21 Asiibil bíil̀ m-pɔbil

ní m dūu kpántì ubunli.

M bàà cí ubɔ ń sɔ̄ m-saai, ama báà ubɔ kaa dɔ́miń.

M bàà nyàab̀ ubɔ ń ŋméeǹ-mi kaa ká.

22 Bi dū ndabiim ki ŋá m-jinti poon,

ní nnyinnyoo yaa cáá-mee, bi tìì-mi ndaam min gàm̀ee^c.

23 Bi-jiŋaalib jinti ń kpántí-bi kutaliŋŋu,

ní kí kpántí bin bi yíińee kpaalaa!

24 Bi-nimbiliŋ ń jɔ̀b̄ kí taa ti nín̄ wāĺ.

Bí nīn pée bōō baabadal^d.

25 Kpáatí a-bum kí sìtī bi-pu,

kí yàntī a-ŋuul ń jà kí cúú-bi.

26 Bi-kɔŋkooŋyi ń kpántí adigbun

ubɔ ń taa ti kɔ́ bi-diiŋŋin^e,

27 kun puee bi sāaǹ un tafal a dáaĺee,

ní ki sòoǹ bin a tīī tiweendee falaau pu.

28 Gíiǹ bi-kpitii kɔkɔ kí túń-bi,

taa pée dūú pɔ̄-bi.

29 Pítí bi-yiŋŋi binifoobi gbɔŋkun^f,

taa kàaǹ-bi kí kūtì deedeedambi pu.

30 Ama mamee m sá unandaan ki bíi jīǹ falaa,

a-jòońdi làá wúń m-pu, Unimbɔti.

31 M làá gāā nlan kí nyɔ̄ŋkì-si,

ní kí jāam̀-si kí lì yii a sá ukpaan.

32 Tíǹ fáatiǹ sii, ti-Dindaan ki jítiǹ unaa,

ki jítiǹ unaja nì iyin nì titafuŋfukul.

33 Bin sīntiǹ bi-ba taapuee làá ká míǹ ní kí nīn fàal̀.

«Nimbi bin nyàab̀ Unimbɔtee,

nimbi di yì mmaŋfafɔkɔn!

34 Di sá yii ti-Dindaan pílifíǹ bifalaadambi,

waa féeń u-yab, ŋyunti ŋun bi yaa bí sarkanee.

35 Kutagbɔŋu nì kitiŋ, nyɔ̄ŋkìmaan-u,

ki kpáaǹ tiŋkub nì tin kɔkɔ bí bi-poonee.

36 Di sá Unimbɔti làá fīī Siiyɔn jool,

ní kí fàtīí mā Juuda timmu.

U-nib làá dāá fōō-mu kí nīn kíǹ ki kóò.

37 U-tɔntɔnliibi biyaamu làá dāá fōō-mu difakal,

ní bin kɔkɔ néeń ti-Dindaanee ń dāá nīn kóò niin.»