Ilan 71

Ti-Dindaan, taa fá-mi

1 Ti-Dindaan, sii ní m sáǹ ki kɔ́,

taa yàntī icoo ń cúú-mi dalba dalba.

2 Fīī-mi kí wúń m-pu a-deedeeu poon.

Kpòon̄ a-tafal m-watil pú, ní kí fīī-mi.

3 Nín̄ sá kutaŋkpanaakoou

kun m làá nīn sáń ki kóò ŋyunti kamaayee.

A lēē yii a làá fīī-mi.

Tiŋman, a sá m-taŋkpanaakooku nì m-balilaŋki!

4 M-Nimbɔtiu, fīī-mi binikpitib ŋaan,

nyāntí-mi binikpɔliibi nì bin dàkà tipɔmbɔtee ŋaan.

5 Ti-Dindaan Unimbɔti, sii pu ní m máká,

doooo m-naacimpɔntin ní m máká a-pu.

6 Daliŋkin bi màl̄-mee, sii pu ní m báká,

sii di nyántìń-mi m-na poon.

Sii ní m làá nīn pée nyɔ́ŋkí.

7 M nìn sá ŋabika ki tīī binib tikpil,

ama sii ní m sáǹ ki kɔ́.

8 A-nyɔŋkii di pée gbí m-nyɔkɔn,

ní m sòoǹ a-nyooti pu iwiin kɔkɔ.

9 M-puti poon nee, taa fá-mi,

m-pɔŋŋu nín bātì nee, taa fàtī a-boon kí tīī-mi.

10 M-nannanliibi sòoǹ m-pu,

bin cɔ́ŋkí-mee kpáfì kinyɔkɔ m-pu.

11 Bi lì yii: «Unimbɔti dū-u ki fá,

jàmaan kí cúú-u,

ubɔ kpá ki làá fīī-u!»

12 Unimbɔti, taa nín̄ dátiǹ-mi,

m-Nimbɔtiu, dāá jòoń-mi malaa.

13 Bin kɔ́kɔĺ-mee,

yàntī icoo ń cúú-bi án nàan̄-bi!

Bin nyàab̀-mi tikpitilee,

yàntī icoo ń cúú-bi bí fá bi-nyooti!

14 Mamee, m làá nīn pée máká a-pu ní,

m làá nīn pée gà ilan ní ki nyɔ́ŋkí-si.

15 M-nyɔkɔ làá nīn sòoǹ

a-deedeeu nì a-fiil pu baabadal,

di sá yii maa ŋūǹ kí kàaǹ a-ŋanti gbanti.

16 Ti-Dindaan Unimbɔti, m làá sòoǹ a-tuŋkpaaŋŋi pu,

m làá téetí yii sii baba di sá deedeedaan.

17 Unimbɔti, doooo m-naacimpɔntin ní a dàkā-mi,

ní m sòon̄ a-maamaaci tuuŋŋi pu ki dāa sāā díǹ.

18 Kɔŋkɔnnee m nín púĺ m-yikpiti píil̀ nee,

Unimbɔti, taa fá-mi.

Niinee m làá ŋmā kí sòoǹ

a-tuŋkpaaŋŋi pu kí tùkù binipɔmbi,

ní kí sòoǹ a-pɔŋŋu pu kí tùkù bin làá páanní bi-boonee.

19 Unimbɔti, binib sòoǹ a-deedeeu pu kitiŋ kɔkɔ pu.

Sii un di ŋá atuŋkpaanee,

ŋma bí kii siiyee?

20 A yāntì m kántì dinimbinaamandi nì agìń,

ama a làá fàtīí tīī-mi dimaŋfal.

A làá dáaĺ-mi kí nyāntí taapu ditaŋkpiilin.

21 A làá tí fàtīí ŋméeǹ-mi,

ní kí gíiǹ m-nyooti kí tīī-mi.

22 Man làá bɔ̀ɔ̀ kubeeu kí nyɔ̄ŋkì-si,

m-Nimbɔtiu, m làá nyɔ̄ŋkì-si a-deedeeu pu.

M làá bɔ̀ɔ̀ kubeeu kí pàkà-si,

Isirayeel deedee Nimbɔtiu!

23 M-nyunculiŋ làá tábití ḿ gāā ilan kí nyɔ̄ŋkì-si,

m làá nīn tátí mpɔn ki fàal̀,

di sá yii a fīī-mi.

24 Baabadalee, m-limbil làá nīn sòoǹ a-deedeeu pu,

di sá yii icoo cúú

bin nyàab̀-mi tikpitilee bi-yiliŋ tīntì.