Ilan 72

Unimbɔti ń bìin̄ ubɔti boon

1 Saloomɔn di ŋmàn̄ nlan nee.

Unimbɔti, yàntī ubɔti ń nín sòoǹ binib bɔti kii siiyee,

kí tīī ubɔti jipɔɔn a-deedeeu.

2 Ú nīn kpòotī a-nibul nì deedee

ní kí nīn sòoǹ biwɔfib bɔti nì ibaamɔn.

3 Deedee puee, ajoon nì ŋgbantamu

ń cáań a-nibul ŋgbansɔŋfi.

4 Ubɔti ń sòoǹ kí pɔ̀ dinibul wɔfib,

ú nīn sá bifalaadambi fiiliu

ní kí nà bin wɔ́b́-bee^a!

5 Ŋwìiń nì uŋmal yaa làá nīn pée bí ki ŋmíntée,

binib làá nīn pée fàŋkí-si ní

kí nīn cá jaanjaan!

6 Ú kpákatiń kii utaa nín nì kusaaun puee,

kii utaa nín nì tikpil ki sɔ̀ŋkī kitiŋ puee!

7 Án bútí deedeedaan u-maŋfal wiiŋyi poon

ní digbíl ń nīn bí kí cáá sāā

daliŋkin uŋmal kaa ti làá nīn bée.

8 Ú jī dibeel kí yòon̄ tiŋku ubɔ kí cáá sāā un kíǹee^b,

ní kí yòon̄ Eefiraati mɔɔl kí cáá sāā kitiŋ gbeennyɔkɔ!

9 Bin kóò kuteeunee làá dāá gbàan̄ u-nimbiin,

ní u-nannanliibi ń dāá ŋmɔ́ ntam.

10 Taarsiisi tiŋki nì ntimu mun nnyim māntìi túee bɔtiibi

làá dāá cáań-u tiwampɔkaal,

Sabaa nì Seeba timmu bɔtiibi

làá dāá pà lampoo kí tīī-u.

11 Bibɔtiibi kɔkɔ làá dāá gbàan̄ u-nimbiin,

atimbun kɔkɔ làá dāá nīn bí u-taapu.

12 Di sá yii u làá dāá fīī uwɔfi un gbáà ibiilee,

ní kí dāá fīī unandaan un kaa cáá ubɔ ń tūtuǹ-uee.

13 U làá dāá sɔ̄ uwɔfi nì ufalaadaan saai,

u làá dāá fīī bifalaadambi maŋfal.

14 U làá dāá fīī-bi kí nyāntí diwɔ́bil nì tipɔmbɔtin,

di sá bi-maŋfal cáá kunyampoou u-nimbiin.

15 Ubɔti ń ká mmaŋfafɔkɔn!

Bi làá dāá tīī-u Sabaa tiŋki sindaariyau.

Bi làá dāá nīn mèé ki tìì-u ŋyunti kamaa,

ní kí nīn mèé baabadal yii Unimbɔti ń bìin̄ u-boon!

16 Kitiŋ ń lòoǹ tiŋan,

tikpaajin ń bìin̄ ajoon pu

kí nīn cáá abil kii Leebanɔn jool puee,

ní binib ń gbí kitiŋin kii kusaaun mɔsɔŋkuee.

17 Ubɔti yindi ń nīn bí ki cá jaanjaan,

u-yindi ń nīn bí kii ŋwìiń nín bí pu jaanjaanee!

Binib ń nīn cáá u-yindi

ki mèé ki bìintí tɔb pu,

ní atimbun kɔkɔ nib ń lì yii u bí mmɔnni.

18 Tí nyɔ̄ŋkì ti-Dindaan Unimbɔti, Isirayeel Nimbɔtiu,

úǹ baba di ŋáań maamaacib.

19 Tí nyɔ̄ŋkì u-yindi din cáá tinyoolee kí nīn cá jaanjaan!

U-nyooti ń gbí kitiŋ kɔkɔ pu!

Án ŋá míǹ, án lafun ŋá míǹ.

20 Jeesee jipɔɔn Daafiidi wimmeem nín kúntí laakiŋyee sɔ̀.