Ilan 73

KUGBƆNTATAATIIU

(Ilan 73–89)

Ba pu ní an bútí unikpiti ní?

1 Asaafi di ŋmàn̄ nlan nee.

Tiŋman, Unimbɔti ŋān̄ ki tīī Isirayeel,

u ŋān̄ ki tīī bin pɔbil bí diba nì uee.

2 Ama fiii di pée kpá ḿ bàà tāā kí lántí,

pɔpɔnaajuba, m ŋātì ki lítì ki dóò.

3 Di sá yii m nín ká an bútì bilambidambi puee,

ní m kíǹ ki cáá binikpitib gbanti pu nnimbitaataam.

4 Tiba kaa pée páb̀-bi áli bi-kúm dal,

ní bi bí gbàlgbal ki cáá laafiya.

5 Bíǹ kaa jīǹ falaa kii bin kíǹee nín jīǹ puee,

agìŋ́kpaan ŋin jēetí binib puee kaa gbèetī-bi.

6 An pu ní dibayoondi kpántì-bi tiwanléeŋkaal,

ní tipɔmbɔti kpántì tiwampeeŋkaal bi cáa pèentí.

7 Bi-nimbiin sá ŋkpam ŋma ní,

tin bi dàkafī bi-pɔbilinee gíti lákatì.

8 Bi bèel̄ binib ní ki sòoǹ tibɔkpitil ŋma.

Bi yòontí bi-ba yilpu ní ki bɔ́ntí ki wɔ́b̀ bin kíǹee.

9 Bi wàantí bi-nyɔmmu kí já nì Unimbɔti,

ní bi-limbiliŋ sòoǹ tikɔkɔ kitiŋ pu.

10 An pu ní Unimbɔti nib fātì bi-ba ki túĺ bi-watil pú,

ní ki fòol̄ bi-nyɔɔbuŋŋi ki nyù kii nnyimee.

11 Bi lì yii: «Mana ní Unimbɔti làá béé?

Yilpu fɔ́ŋŋŋ Nimbɔtiu pée nyí tin bíi jītéeee?»

12 Kpèèmaan binikpitib gbanti,

tiba kaa pée páb̀-bi ní an bútí-bi ki kútí.

13 Mimmee m pée ŋá m-pɔbil circir

ki fíntì m-ŋalii kí dàkà yii m sá maanyiiba fám deeyaa!

14 Falaa bà-mi baabadal,

ní m bí ditafadaaldin kutaafaau kamaa.

15 Báà m yaa bàà bí yii:

«M làá sòoǹ kii bíǹ nín sòoǹ pueeyaaa,»

m nyáń a-nibul boon dee.

16 Ní m dākafì kí gbìl̄ taapu,

ama ní m ká yii an pɔ̄ɔ̄ m-cee.

17 See m nín kɔ́ kunimbɔtidiinee

ní m gbìl̄ tin dɔ̄ ki cí binikpitibee taapu.

18 Tiŋman, a làá dū-bi kí tɔ́kɔń dijɔnjɔndi pu,

ní kí yàntī bí lítí kí nàan̄.

19 Ba ní an nāaǹ-bi dicilpu dicilpu mimmee!

An dóò bi-pu dee, dinyoondi nāaǹ-bi!

20 Ti-Dindaan, a yaa yíkèe,

bi làá wāŋkì kii unil nín dámintí pu kí fìntī kí súntée ní.

21 Ŋyuntee, m-pɔbil nìn bí ntuntunni

ní m-poon kaam nìn cɔ́tì.

22 M nìn sá ugbaan ní kaa gbìl̀ báà tiba taapu,

m nìn bí kii kuwaŋkuluuee ní a-cee.

23 Nì míǹ kɔkɔee, m pée bí a-cee ní.

A cúú m-ŋaŋgiil,

24 ki dàkā-mi nsan ŋun m máaǹ ki nóóyee,

ní boonee á dāá fōō-mi nì tinyool.

25 Ŋma ní m làá nīn cáá yilpu beelin?

M nín bí a-cee nee, ba ní m gíti là kitiŋ pu?

26 M-wunti nì m-pɔbil ŋūǹ kí bɔ́ń,

ama Unimbɔti di sá m-taŋkpal din pɔ̄ɔ̄yee,

ní ki sá m-fakal kí nīn cáa cá jaanjaan.

27 Di sá yii bin kɔkɔ fātì bi-boon ki tīī-see làá kpú kí céetí,

a làá nàan̄ bin kaa yú nì si deedeeyee.

28 Ama kun tìì-mi mmɔnee di sá ḿ nīn bí ki pìlīǹ Unimbɔti.

Ti-Dindaan Unimbɔti, m sáǹ ki kɔ́-si ní

kí ŋmā kí sòoǹ a-tuuŋŋi pu.