Unimbɔti, fīī Isirayeel a-nibul
74
1 Asaafia di ŋmàn̄ nlan nee.Unimbɔti, ba pu ní a dū-ti ki fá talku?
Ba pu ní a-ŋuul dàn̄ a-picaŋkpuŋku kun a kpàáyee pu míǹ?
2 Taa súntí a-nibul din a dá doooo ŋkilkaaminee,
kunaakoou kun ní a fīī ku sá a-yɔkuee,
Siiyɔn jool din a nìn dūu ŋá a-kɔŋkooŋŋuee pu.
3 Còomìń kí dāá kpèè adigbuŋkati ŋin dɔ̄ doooo jaanjaan nee,
unannanli gbáń ki bíil̀ tikɔkɔ Circir kɔŋkooŋŋun.
4 A-nannanliibi fáá dijajil wiliilii
a-circir kɔŋkooŋŋun.
Bi dū bi-jajil ŋaabiki ki sākaǹ niin.
5 Bi náań nì bidɔgaaliibi bin bí kubambaŋŋun
ki gà isufi nì ncɔkɔmuee.
6 Tiwan tin bi dū idɔ ki kpítèe,
bi dū ncɔkɔmu nì akújal ki gbáń ki wīil̀ kɔkɔ.
7 Bi sēē a-circir kɔŋkooŋŋu ŋŋmi.
Bi gbáń ki wīī a-diiku, ki kɔ́ǹ-ku tijɔkɔndi.
8 Bi lī bi-pɔbilin yii: «Tí nàam̄maan-bi dicilpu.»
Bi wùn̄ ipaan in kɔkɔ bí kitiŋ nee poon
bi kpáfí ki jáaḿ sii Unimbɔtee.
9 Taa ti wāĺ a-bítam daanti,
bibɔnaatiliibi gíti kpá,
ní ti-kansikin ubɔ mun kaa nyí
daliŋkin ní tíǹ gbanti kɔkɔ làá kúntée.
10 Unimbɔti, kí cáá sāā ŋyunti ŋulɔŋu
ní a-nannanliibi làá nīn bí ki lāā-si ní?
Mimmee bi làá nīn pée bí ki kpèé a-yindi fám míǹ ki cáaa?
11 Ba pu ní a kóoǹ a-ŋal, a-ŋaŋgiil?
Tàntī-ŋu kí kpɔ̀ kí céetí-bi!
12 Ama sii Unimbɔti un sá m-bɔtiu doooo ŋkilkaaminee,
a fīī-ti ŋfunyɔm kupaau kitiŋ pu.
13 A dū a-pɔŋŋu ki yākatì tiŋku nyim mili,
ki fáá ki mátì tipeebilindi tin bí nnyiminee yiliŋ.
14 A gbáń ki wīī kupeebiliŋŋu Leefiyatan yil
ní ki dū ku-wunti ki tīī kuteeun peelii ŋmɔ́.
15 Sii di cátì nsan ki tīī inyimbul nì mbùmbiyaamu,
sii di yāntì ibuŋkpaan in nyim kaa fóotée fóotì.
16 Sii di yì ŋwiimpu, ní ki yì kunyeeu mun,
sii di kāaǹ uŋmal nì ŋwìiń i-paaŋyi pu.
17 Sii di yóoǹ kitiŋ kpaanyɔmmu kɔkɔ,
sii di tí náań dipeel nì kuseeu.
18 Ti-Dindaan, téetí yii unannanli bíi lāā-si,
dinibul din nib sá bigbaambi nee bíi kpèé a-yindi fám.
19 Taa dū a-nanjilb naŋki kí líiǹ upeecuncuti,
taa súntí a-nandambi pu talku.
20 Téetí a-poondi pu,
di sá yii tipɔmbɔti gbí kitiŋ nee
saŋkaŋkpiliŋ laakin dibɔmbɔndi bée.
21 Taa ti yàntī icoo ń cúú un bi wɔ́b́ee,
ama yàntī ufalaadaan nì unandaan ń nyɔ̄ŋkì a-yindi!
22 Yīkìm̄ Unimbɔti, mɔ̄tì a-ba pu.
Á taa súntí tiniyool nee nín sìí-si baabadal puee.
23 Á taa súntí a-nannanliibi kuŋkuuntii pu,
á taa súntí bin jáà nì see tantatii in kaa kúntée pu.