Ilan 75

Unimbɔti di sá ubɔsoonli

1 Asaafi^a di ŋmàn̄ nlan nee ki tīī bilaŋgaaliibi kpiliu.

2 Ti nyɔ́ŋkí-si, Unimbɔti, ti nyɔ́ŋkí-si,

ti báakí ki lì a nín sá ukpaan puee,

binib sòoǹ a-maamaaci tuuŋŋi pu.

3 Unimbɔti bí yii: «Ŋyunti ŋun m síiǹee yaa láa bàn̄ee,

m làá dāá sòoǹ binib bɔti nì ibaamɔn.

4 Kitiŋ yaa cīŋkì ki kpáaǹ tin kɔkɔ kóò ki-puee,

man di ŋúb́ ki-jaantalkub an píkí.»

5 M tùkù bilambidambi yii: «Taa ti nín̄ lámintímaan!»

ní ki tùkù binikpitib yii: «Ní taa nín còom̄ ni-yiliŋ gáań.

6 Ní taa nín còom̀ ni-yiliŋ gáań yilpu yilpu,

ní taa nín̄ sòoǹ ki yòontí ni-ba yilpu.

7 Aayee, an kaa sá ŋwìiń nyalaŋki pú

àá ŋwìiń jeetilaŋki pú àá kuteeun

ní tikpaandi nyēeń.

8 Di sá yii Unimbɔti di sòoǹ binib bɔti,

ki sìntī ubɔ taapu ní ki yòontí un kíǹee yilpu.»

9 Ti-Dindaan ŋúb́ u-ŋaan binikpitib bɔsooŋyi yuku,

ndaam min bi tɔ́ dinyaalee kā ku-poon.

U bātì-mì ki tīī kitiŋ pu nikpitib kɔkɔ bí nyɔ̀,

bi làá nyɔ̀-mì kí kpáaǹ tidakpati kɔkɔ.

10 Mamee, m làá sòoǹ kí taa gbèen̄,

m làá nīn gà ilan ki nyɔ́ŋkí Jaakɔb Nimbɔtiu.

11 Unimbɔti bí yii: «M làá yàntī binikpitib yiliŋ ń nīn tīī,

ama ní deedeedaan yil ń nīn gáań.»