Ilan 76

Unimbɔti yāntì kujaau gbēeǹ Siiyɔn jool pu

1 Asaafi^a di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ tibati ní ki gà-ŋu. Nlan.

2 Unimbɔti yāntì binib béè-u Juuda tiŋkin.

U-yindi sá dikpaandi Isirayeel tiŋkin.

3 Saleem^b tiŋkin ní u-tantiu bí,

u-kɔŋkooŋŋu bí Siiyɔn jool pu ní.

4 Niin ní u kɔ́fì ipiin in fòol̄ ŋŋmee

nì agbampɔɔ nì ntàataajimu,

ní ki yāntì kujaau gbēeǹ.

5 A jìl̀ ki ŋān̄ tikpil,

ajoon ŋin a jáń ki fōōyee pu.

6 Bi fúkúl̀ bijanjaliibi bin cáá dipɔbilee wanti pílpil,

bi gèen̄ kaa ti fīntì,

bibaatandambi gbanti kɔkɔ ŋalii kpíì^c.

7 Jaakɔb Nimbɔtiu, a nín tāā ki bíikèe,

bitanjakaliibi nì itaamu wunti kpíì ní.

8 Sii di sá kuwambiiu.

A yaa gíí diŋuulee,

ŋma di ŋūǹ kí yūĺ a-nimbiin?

9 Doooo yilpu ní a yàntī bi gbìl̀

a nín sòoǹ binib bɔti puee.

Kitiŋ pu nib fàŋkí ní kí ŋmīĺ díkí diki,

10 ŋyunti ŋun ní sii Unimbɔti yaa yíkì ki bíi sòoǹ binib bɔti,

kí fīī bin sá binandambi kitiŋ puee.

11 Ibaamɔnee, binib ŋuul sá inyɔŋki laŋyi ní ki tīī-si,

ní a dù bin gbíntì diŋuul gbantinee ki gbìǹ a-caŋ kii dambalee.

12 Pòom̄maan ti-Dindaan ni-Nimbɔtiu ipoon,

ní kí ŋá kii ni nín pōoǹ puee.

Nimbi bin kɔkɔ māntìi tú-uee,

ní cáaḿmaan ni-wampɔkaati kí tīī Unimbɔti un cáá tifaandee.

13 U sìntī abɔtibil ŋin cáá dilambilee taapu,

ní ki yàntī kitiŋ pu bɔtiibi fàŋkí-u yɔ́kɔ́ yɔkɔ.